2020 оны нэгдүгээр сарын 31-ний өдрөөс 12 дугаар сарын наймныг хүртэлх хугацаанд Олон улсын Улаан загалмайн нийгэмлэг болон Улаан хавирган сар хамтран БНАСАУ-д коронавирустэй тэмцэх хөтөлбөрийн хүрээнд 700 мянган ам.долларын тусламж үзүүлжээ. Энэ талаар Регнум агентлаг мэдээлсэн байна. 

Эх сурвалжийн мэдээлснээр, дээрх тусламжийн 330 мянган ам.доллар нь эрүүл мэндийн салбарт, 50 мянга нь ундны ус, эрүүл ахуйн хэрэгслийн хангамж, 25 мянга нь Хойд Солонгосын Улаан загалмайн нийгэмлэгийн ажлыг дэмжихэд зориулагджээ. 

Хойд Солонгост коронавирустэй тэмцэх төрөл бүрийн арга хэмжээ зохион байгуулахад дайчлагдсан Улаан загалмайн нийгэмлэгийн сайн дурынхны тоо 100 мянга давсан байна. Түүнчлэн энэ байгууллагын тусламжтайгаар хэт улаан туяаны халуун хэмжигч, хувийн хамгаалалтын хэрэгсэл, оношилгооны багц болон тусгаарлалтад байгаа БНАСАУ-ын 5.5 мянган иргэнд хувийн ариун цэврийн хэрэгсэл зэрэг шаардлагатай эд зүйлсийг нийлүүлжээ.

Энд дуулгахад, Хойд Солонгост коронавирусийн халдвар бүртгэгдээгүй гэж эрх баригчид нь албан ёсоор мэдэгддэг ч сүүлийн үед хязгаарлалт, хөл хорио улам чангарч байгаа талаар хэвлэлүүд мэдээлж байв. 

Г.Бямбасүрэн