АНУ-ын өнөөгийн Ерөнхийлөгч Дональд Трампыг дэмжигчид үймээн үүсгэж, Вашингтон дахь Конгрессын байрыг эзлэсний дараа Жо Байден АНУ-ын иргэдэд хандан үг хэлжээ. Түүний мэдэгдлийг Юүтүб сувгаар дамжуулсан байна.

Байден мэдэгдэлдээ Вашингтон дахь эсэргүүцэгчдийг хүчирхийллээ зогсоож, "ардчилалд зам тавьж өгөх"-ийг уриалсан байна. Тэрбээр болж буй үйл явдлыг эсэргүүцэл биш харин Америкийн ардчилсан тогтолцоонд аюул учруулж буй үймээн хэмээн нэрлэжээ. 

Түүнчлэн Дональд Трампад хандан Капитолийг бүсэлсэн байдлыг нэн даруй зогсоохыг шаардах хэрэгтэй хэмээн уриалжээ.

"Трамп тангаргаа биелүүлж, үндсэн хуулийг хамгаалан, энэ байдлыг дуусгахыг шаардан үндэсний телевизээр яг одоо мэдэгдэл хийхийг уриалж байна" хэмээн Жо Байден мэдэгджээ.

Вашингтон хотноо Капитолийн ордны гадна Трампын дэмжигчид эсэргүүцлийн ажиллагаа зохион байгуулж, улмаар Ерөнхийлөгчийн сонгуулийн дүнг баталгаажуулах Конгрессын байр руу нэвтрэн орсон юм. Эмх замбараагүй байдал үүссэний улмаас хурал тасалдаж, дэд Ерөнхийлөгч Майк Пенс болон сенатчдыг нүүлгэн шилжүүлсэн байна.

Эх сурвалжуудын мэдээлснээр эмх замбараагүй байдлын үеэр хэд хэдэн хууль сахиулагч шархдаж, эсэргүүцэгчдийн дунд байсан нэг эмэгтэй конгрессын барилга дотор галт зэвсгийн шарх авч, улмаар эмнэлэгт хүргэгдсэнийхээ дараа нас баржээ. 

Вашингтонд үүссэн эмх замбараагүй байдлын улмаас энэ хотод хөл хорих цаг тогтоосон байна. Түүнчлэн Трамп Вашингтонд эмх журам сахиулах үүднээс Үндэсний гвардынхныг оруулахыг тушаажээ. Сүүлийн үеийн мэдээллээр, Капитолийн ордныг эсэргүүцэгчдээс чөлөөлжээ.

Конгрессын ордныг эсэргүүцэгчдээс чөлөөлж, Вашингтонд хөл хорих цаг тогтоов

Г.Бямбасүрэн