УИХ-ын чуулганы нэгдсэн хуралдаан хуралдаж байна. Хуралдаанаар Үндсэн хуулийн цэцийн дүгнэлтийг хэлэлцэж, хүлээж авах боломжгүй гэж үзлээ. Дараагаар нь Шүүхийн тухай хуулийн шинэчилсэн найруулгын төслийн анхны хэлэлцүүлгийг хийж  эхэллээ. Хэлэлцэж байгаа асуудалтай холбогдуулан гишүүд асуулт тавьж, хариулт авч байна. 

УИХ-ын гишүүн Ш.Адьшаа:

-Шүүхийн хуулийг хэлэлцэж байгаатай холбогдуулан асуулт байна. шүүх эрх мэдлийн амин сүнс болсон Үндсэн хуулийн бүтцийн байгууллага болох ШЕЗ, боловсон хүчний, эдийн засгийн хараат байдалд оруулж, хууль тогтоох байгууллагын харьяанд авч ирлээ. УИХ төсөв хөрөнгийг нь баталж, боловсон хүчний бодлогыг нь дагнан явуулдаг тогтолцоог энэ хуулиар бий болгож байна. Шүүхийн бие даасан хараат байдлаар ажиллана гэсэн үзэл баримтлалыг энэ нь зөрчиж байна. 

Хуульзүйн байнгын хорооны дарга С.Бямбацогт:

-Монгол Улсын Их хурал төрийн эрх барих дээд байгууллага мөн бөгөөд хууль тогтоох эрхийг батална. УИХ төрийн дотоод, гадаад аль ч бодлогыг санаачлан хэрэгжүүлж болно. Энэ хүрээндээ УИХ хууль баталж байгаа. УИХ-аас өөр аль нэг субьект хууль батлахгүй. Хоёр парламент дамжуулан одоогийн УИХ хэлэлцэж байна. Шүүхийн тухай хуулийг Ерөнхийлөгчийн санал авсан, АН-ын бүлгээр хэлэлцүүлж, санал авсан. Засгийн газар хууль санаалчилсан. 

УИХ-ын гишүүн Б.Энхбаяр:

-Адьшаа ажлын хэсгийн гишүүн. Ажлын хэсэг дээр ярих бололцоотой, хоёр сар хэлэлцэж байхад өөрөө цөөхөн ирнэ. Хар хүний өмнөөс шар хүн гэгчээр хэнээс эрх мэдэл булаах гээд байгаа юм, гомдоод байгаа юм шиг яваад байна. ШЕЗ, Сахилгын хорооны гишүүнийг Ерөнхийлөгч томилж байгаа. Хэт их эрх мэдэл өгөхөөр ялзарна. Нэг хүний төлөөлөл болж орж ирсэн юм уу, нийт ард түмний төлөөлөл болж орж ирсэн юм уу. 

УИХ-ын гишүүн С.Чинзориг:

-Шүүхийг шударга болгох гэдэгтэй санал нэг байна. Шүүгчдийн нийгмийн хамгаалалтай холбоотой асуудлыг зохицуулахдаа суурь хуулиудаараа асуудлыг шийддэг баймаар байна. Хууль хүчний байгууллагын хуулийг ярихаар суурь хуулиа дордуулаад байдаг. Шүүгчдэд дөрвөн төрлийн нэмэгдэл олгодог байсан. Гэтэл хоёр хувийн цалин гэж байна. Энэ нь шүүгчийн цалин хөлсийг доруулж оруулж иржээ. Шүүгч бол төрийн албан хаагч. Шүүх хуралдаан мэтгэлцээний зарчмаар явуулдаг. 

УИХ-ын гишүүн Б.Энхбаяр:

-Шүүгчийн хариуцлагыг чангатгах чиглэлд гол анхаарсан. Тийм учраас Сахилгын хороог байгуулан баталсан. Сахилгын шүүх гэдэг ойлголт. Цэц бол Үндсэн хуулийн шүүх. Ажлын хэсгийн явцад тодорхой процессийн алдаа гаргавал Улсын дээд шүүх сахилгын хорооны шийдвэрийг эргэж харахаар зохицуулалт хийж байгаа. Шүүх бол шударга ёсны манаач. Тушаал гүйцэтгэдэг хүмүүсийн цалинтай харьцуулж яримааргүй байгаа. Шүүгчдийг зэрэг дэвээр эрэмбэлж болохгүй. 

Чуулганы хуралдаан үргэлжилж байна. 

Н.Нягт