Хосын харилцаа гүнзгий байхын хэрээр дурласан хосын биологийн хөгшрөлтийн явц удаан явагддаг гэдгийг АНУ-ын Отаго болон Дьюекийн сургуулиуд, Шинэ Зеландын эрдэмтэд тогтоожээ. Харин төдийлөн эв зүйгээ олдоггүй хосууд илүү хурдтай хөгширдөг байна.

Геронтологи буюу насжилт судлалын үүднээс биологийн хөгшрөлт нь олон жилийн туршид бүхий л эд эрхтнүүд зэрэг биеийн физиологийн үйл ажиллагаанууд аажмаар унахыг хэлдэг. ЭНэ нь архаг өвчний суурь болдог бөгөөд энэ явцыг удаашруулах аргыг дэлхий даяар эрдэмтэд хайсаар л байгаа юм. 

Насжилтад нөлөөлдөг хүчин зүйлсийг тогтоохын тулд судалгаа хийж,  АНУ, Шинэ Зеландын эрдэмтэд Данидины туршилтын хүмүүсийг судалгаандаа оролцуулжээ. Данидины туршилт гэдэг нь 40 орчим жил үргэлжилж байгаа бөгөөд товчхондоо бол 1972-73 онуудад Шинэ Зеландын Данидин хотод төрсөн охид хөвгүүдээс бүрдсэн 1000 гаруй хүүхдийг сонгон авч, хүүхэд болон өсвөр насан дахь үүссэн ямар нөхцөл насанд хүрсэн хойно нь  нөлөөлж байгааг судлахаар тасралтгүй ажиглаж байгаа юм. 

Ингээд Данидины  туршилтаас   судалгааны оролцогчдын сонгон, оролцогчдод "романтик харилцааны ихэнх хэсэг хэзээ үүсч, хэр удаан байдаг" талаар 4 удаа буюу 26, 32, 38 болон 45 настайд нь асуужээ. Улмаар оролцогчдын биологийн хөгшрөлтийн хэмнэл  болон хосын харилцааны онцлогуудыг харьцуулсан байна. 

Артерийн даралт, холестериний түвшин, биеийн жингийн индекс, шүдний эрүүл мэнд зэрэг 18 үзүүлэлт, гадна төрх (туршилтад оролцож буй хүмүүсийн гэрэл зургийг тусгай комисс харьцуулжээ), харилцааны ойр дотно байдлын түвшнийг асуун, сэтгэлзүйн болоод биеийн хүчирхийлэл байдаг эсэхийг асуух замаар олж авсан хосын харилцааны мэдээллүүд зэрэг үзүүлэлтүүдээр хөгшрөлтийг тодорхойлжээ. Түүнчлэн бага насанд тохиосон таагүй үйл явдал, нийгэм эдийн засгийн байр суурь, эрүүл мэндийн байдал, боловсролын түвшин болон тамхи татдаг эсэх зэрэг хүчин зүйлсийг ч харгалзсан байна. 

Ингээд эрдэмтэд судалгааныхаа явцад дараах дөрвөн дүгнэлтэд хүрчээ:

• Судалгааны 3-4 үеийн шатны туршид хосын харилцаа үүсгээгүй оролцогчид хостой оролцогчтой харьцуулахад дунджаар 2.9 насаар илүү хөгширчээ. 
• Цаашлаад эрдэмтэд дор хаяж туршилтын хоёр шатны туршид хосын харилцаатай байсан оролцогчдыг судалсан байна. Тэдний харилцаа сайн байхын хэрээр хөгшрөлтийн явц удаан байгаа нь ажиглагджээ.
• Харилцаанд нь сэтгэлзүйн эсвэл биеийн хүчирхийлэл байгаа гэж хариулсан оролцогчид бусдаас илүү их өтөлсөн байсан гэнэ.
• Хөгшрөлтийн явцыг удаашруулах эсвэл түргэсгэхэд хостой байх, хосын харилцаа нь тааламжтай байх болон хүчирхийллийн түвшин гэсэн гурван хүчин зүйл гурвуулаа нөлөөлдөг болох нь тогтоогджээ.

Г.Бямбасүрэн