Мягмар гарагт ОХУ-ын Ерөнхийлөгч Владимир Путин Оросын Төмөр зам (shuud.mn: РЖД) -ын Якутаас Хятад руу нүүрс зөөх төмөр зам, дэд бүтцийг барих шинэ мега төслийг дэмжжээ. 

"Ази Номхон далайн бүс нутгийн зах зээл дээр Оросын компаниуд нөхөж болохуйц нэмэлт эрэлт байгаа"-г Оросын Ерөнхийлөгч нүүрсний салбарын хөгжлийн зөвлөгөөнийг нээх үеэр онцолсон байна.

"Энэ мөчийг алдаж болохгүй. Дотоодын нүүрсний үйлдвэрлэлийн экспортын хүчин чадлыг нэмэгдүүлэх ёстой" хэмээн Путин мэдэгдсэн байна.

Өнгөрсөн оны дүнгээр Оросын нүүрсний олборлолт 9 хувь харин экспорт 3 хувиар буурсан байна. Хилийн чанад руу нийлүүлсэн 199 тонн нүүрснээс гуравны хоёр орчим нь Азийн орнуудыг чиглэжээ.

Экспорт нэмэгдүүлэхэд саад болж буй гол хүчин зүйл нь тээврийн дэд бүтэц аж. Оросын төмөр замын тооцоолсноор Дорнод Сибирийн орд газруудаас 56 сая тонн нүүрс "илүүдэл" болж, ачаа тээвэрлэлтийн хүчин чадал хүрэлцэхгүй байгаа гэнэ.

Энэ асуудлыг шийдэхийн тулд 700 тэрбум рубль буюу 9.6 тэрбум ам.долларын өртөгтэй, Тынд-Комсомольск-Ванино хэсэг Байгал-Амурын төмөр замыг өргөтгөх төсөл санал болгожээ. Энэ төслийн дагуу мянга орчим километр гол төмөр зам барих, Амур дээгүүр гүүр, Хабаровскийн хязгаар руу хүрэх шинэ Кузнецовын хонгил барихаар төлөвлөсөн байна.

Энэ санааг ОХУ-ын Ерөнхийлөгч дэмжжээ. Улмаар Якутаас дорнод чиглэл рүү зөөх нүүрсний хэмжээг нэмэгдүүлэх Байгал-Амурын төмөр замын дорнод хэсгийг хөгжүүлэх нэмэлт санал боловсруулахыг Засгийн газартаа үүрэг болгосон байна.

Төслийг хэрэгжүүлэх хөрөнгийг Үндэсний баялгийн сангаас гаргах боломжтой гэж Путин үзэж байгаа гэнэ. "Энэ сангаас мөнгө гаргах шаардлагатай бол гарга. Би эсэргүүцэхгүй" хэмээн Путин мэдэгдсэн байна.

Г.Бямбасүрэн