"МҮЭ-Үнийн хөөрөгдлийн эсрэг" нэртэй жагсаал цуглаан 12.00 цагт Улаанбаатар хотод Сүхбаатарын талбайд, орон нутагт аймаг, хотын төв талбайд нэгэн зэрэг эхэллээ. Жагсаал цуглаанд МҮЭ-ийн холбоо, 13 салбар /эрчим хүч, авто тээвэр, багш, эмч, хувийн хэвшил гэх мэт/-ын холбоо, 21 аймаг, орон нутгийн нийт 50000 ҮЭ-ийн гишүүд хөдөлмөрчид эвлэлдэн нэгдэж байна. Валютын ханшны өөрчлөлтөөс шатахууны үнэ нэмэгдэж, үүнийг дагаад өргөн хэрэглээний бараа, бүтээгдэхүүний үнэ өссөнтэй холбогдуулан Засгийн газарт гурван талт хэлэлцээр хийх саналыг МҮЭХ-ноос удаа дараа тавьсан боловч өдгөөг хүртэл хариу ирүүлээгүй байна. Үүссэн нөхцөл байдалтай холбогдуулан МҮЭ-ийн холбооны Ерөнхий зөвлөлийн тэргүүлэгчид 2012 нэгдүгээр сарын 16-ны өдөр өргөтгөсөн хурал хийж МҮЭ-үүдээс зохион байгуулж буй тэмцлийн үйл ажиллагаанд шилжих нь зүйтэй гэж үзэн тэмцлийн эхний арга хэмжээ болгон энэхүү жагсаал цуглааныг орон даяар хийж байгаа юм. Жагсаал цуглаанаас гарсан шаардлагыг Монгол Улсын их хурал, Засгийн газарт өгснөөр энэхүү үйл ажиллагаа өндөрлөнө.