Коронавирусийн өдөрт илрэх халдварын тоо 200-г давлаа. Өнөөдөр нийт 210 хүнд халдвар илэрсэнийг ХӨСҮТ-өөс мэдээлэв. Шинээр илэрсэн 210 тохиолдлын 206 Улаанбаатар хотод бүртгэгдлээ. Ингэснээр манай улсын нийт батлагдсан тохиолдол 5186 боллоо.
Засгийн газрын Хэвлэл мэдээлэл, олон нийттэй харилцах албаны дарга Ц.Ганзориг “Өдөрт илрэх халдварын тоо 200-г давбал хатуу хөл хорио тогтоохоос өөр аргагүй” хэмээн мэдээлж байв. Мөн Ерөнхий сайд Л.Оюун-Эрдэнэ өнөөдөр Улсын онцгой комисст “иргэдээс мэдээлэл нуухгүй, хөл хорио тогтоох бол эрт мэдээлэх” чиглэлийг өгсөн байна. Халдварын тоо 200-г давах нь цаг хугацааны л асуудал байв. Учир нь гуравдугаар сарын 10-наас эхлэн өдөрт илрэх халдварын тоо 100-г давж,
III сарын 17-нд 130
III сарын 18-нд 158
III сарын 19-нд 160
III сарын 20 148
III сарын 21-нд 170 тохиолдол илэрч, өнөөдөр 200-г давлаа. Засгийн газрын тогтоосон Улаан бүс рүү орох нөхцөл бүрдсэн гэсэн үг. Өнөөдөр эл асуудлаар УОС, НОК хуралдах юм байна.
Эмнэлгүүд ачааллаа дийлэхээ болилоо
Манай улс коронавирус халдварыг ХӨСҮТ, Цэргийн төв эмнэлэг, “Эх нярай эмэгтэйчүүдийн үндэсний төв-2” эмнэлэгт эмчилж байгаа. Харин сүүлийн өдрүүдэд коронавируст халдварын тархалт эрчимтэй нэмэгдэж, эмнэлгүүдийн орны ачаалал эрс нэмэгдлээ. Тиймээс дүүргийн эмнэлгүүдэд нэмэлтээр ор дэлгэж байна. Одоогоор Сүхбаатар дүүргийн нэгдсэн эмнэлэгт 150 ор, Баянгол дүүргийн Эрүүл мэндийн төв болон Сонгинохайрхан дүүргийн нэгдсэн эмнэлэгт тус бүр 100 орыг нэмэлтээр дэлгэн ажиллуулж эхэллээ.
Өнөөдрийн байдлаар дээрх эмнэлгүүдэд коронавирус халдвартай 1407 хүн хэвтэн эмчлүүлж байна.
Орон нутгаас эмч нарыг татлаа
Нийслэлд ковид-19-ийн нөхцөл байдал хүндэрсэнтэй холбогдуулан ХӨСҮТ-ийн тандалт судалгааны багийг өргөжүүлэх зорилгоор 16 аймгаас нийт 80 хүний бүрэлдэхүүнтэй эмч эмнэлгийн ажилчдыг дайчлан ажиллуулж эхэллээ. Аймаг бүрээс ирсэн баг тус бүрд эмнэлгийн тархвар судлаач, сувилагч, жолооч, лабораторийн мэргэжилтэн багтсан байна. Орон нутгийн эмч нар ХӨСҮТ, НЭМҮТ болон, нийслэлийн хоёрдугаар төв эмнэлгийн лабораториудад ажиллаж байна.
В.Бат