Израильд тус улсын Ерөнхий сайд Биньямин Нетаньяхуг шүүх ажиллагаа дахин эхэллээ.Түүнийг авлигын хэрэгт буруутгаж байгаа бөгөөд шүүх ажиллагаа гурван жилийн өмнөөс эхэлсэн юм. 

DW агентлагийн мэдээлснээр, шүүх хурал дээр улсын яллагч Лиат Бен-Ари Израилийн Ерөнхий сайд Биньямин Нетаньяху авлига авсан, эрх мэдлээ урвуулан ашигласныг гэрчлэх  "олон тооны, томоохон нотолгоонууд" байгаа хэмээн мэдэгдсэн байна. Иерусалимын Тойргийн шүүх дээр Израилийн сайд нарын танхимын тэргүүнийг шүүх ажиллагаа эхлэх үеэр улсын яллагч прокурорын газрын байр суурийг ийнхүү илэрхийлжээ. 

Улсын яллагчийн өгүүлснээр, Биньямин Нетаньяху "Израилийн гол олон нийтийн хэвлэл мэдээллийн хэрэгслийн эздээс байж болох олон төрлийн шан харамж" авч, ашиг сонирхолдоо нийцүүлэн, Ерөнхий сайдын албан тушаалд дахин сонгогдохын тулд хэвлэлүүдийг ашигласан гэнэ.

Ерөнхий сайд шүүх хурал эхэлснээс 20 минутын дараа хурлын танхимд орж иржээ. Ерөнхий сайдын өмгөөлөгч нарт үг хэлэх боломж өгөөгүй, гэрчүүдийн мэдүүлгийг сонсож эхэлсэн байна.

Удалгүй шүүх хурлын завсарлагааны дараа Ерөнхий сайд танхимыг орхин явсан гэнэ. Түүнийг гуравдугаар сарын 23-ны парламентын сонгуулийн дүнгээр эвсэл байгуулахтай холбоотой асуудлаар завгүй байгаа тул шүүх хурлаас явуулахыг өмгөөлөгчид нь хүссэн аж. 

Израилийн Ерөнхий сайд өнөөг хүртэл хоёронтоо шүүх хуралд оролцсон бөгөөд өмнө нь 2020 оны тавдугаар сарын 24, 2021 оны хоёрдугаар сарын наймны өдөр тус тус түүний гэм бурууг шүүх хурал болж байсан юм.

Олон жил үргэлжилсэн мөрдөлт буюу Нетаньяхуг ямар хэргээр буруутгаж байгаа вэ? 

Ерөнхий сайдтай холбоотой хэргийг Израилийн цагдаагийнхан гурван жил гаруй хугацаанд шалгасан юм. Ингээд хэргийг шалгаж дуусаад,  "1000-ын хэрэг", "2000-ын хэрэг", "4000-ын хэрэг" гэсэн гурван өөр хэргээр Нетаньяхуг буруутгасан байна. 

"1000-ын хэрэг" гэдэг нь луйвар болон өөрт нь хүлээлгэсэн итгэлийг буруугаар ашигласан гэх хэрэг бөгөөд түүнийг төрөл бүрийн "тус үзүүлснийхээ" хариуд бизнесменүүдээс ихэвчлэн навчин тамхи, оргилуун дарс зэрэг бэлэг авсан гэж буруутгаж байгаа юм.

"2000-ын хэрэг" нь мөн л луйвар болон өөрт нь хүлээлгэсэн итгэлийг буруугаар ашигласан гэх хэрэг бөгөөд өөрийнх нь талаар эерэг мэдээлэл түгээсэн тохиолдолд "Едиот Ахронот" гэх сонины нэр хүндийг, өсгөх санал тавьсан гэж буруутгаж байгаа гэнэ. 

"4000-ын хэрэг" нь өөрийнх нь тухай эерэг мэдээллүүдийг Walla мэдээллийн цахим хуудас дээр байршуулсны хариуд теле харилцааны том компанийн үндсэн хувьцаа эзэмшигчийн ашиг сонирхолд нийцүүлэн шийдвэр гарган худалдагдах, луйварлах, итгэлийг буруугаар ашигласан хэрэг үйлдсэн гэж буруутгаж байгаа аж. 

Нетаньяху дээрх үндэслэлүүдийг эрс няцаан, улс төрийн өрсөлдөгчдийнх нь зохион байгуулсан өөрийг нь "намнах" ажиллагаа хэмээн нэрлээд нэр төрөө хамгаална гэж тангараглажээ.

Шүүгдэгч Ерөнхий сайдын алба хаших боломжтой юу?

Ажил үүргээ гүйцэтгэж байх хугацаандаа шүүхийн өмнө зогссон улс төрчийн талаар төдийлөн сонсогддоггүй. Харин Израилийн хуулиар хууль зөрчсөнд буруутгагдаж байгаа Ерөнхий сайд албан тушаалаасаа огцрох шаардлагагүй байдаг гэнэ.

Гэхдээ Нетаньяхугаас өмнө ийм тохиолдол гарч байсангүй. Ерөнхий сайд асан Эхуд Ольмерт 2008 онд авлигын хэргээр шалгагдаж байхдаа намын даргын албан тушаалаас буусан ч 2009 онд бүх нийтийн сонгууль хүртэл албан тушаалаа хашиж байв. Хэдийгээр түүнийг шүүх ажиллагаа 2009 онд эхэлж байсан ч 2016 онд л Эхуд Ольмертэд ялын тогтоол уншиж байжээ. 

Харин Биньямин Нетаньяхугийн хувь заяа хэрхэн эргэх талаар Израильд өөр өөр байр суурьтай байна. Нетаньяху ерөнхий сайдын албыг хашихын зэрэгцээ эрүүгийн хэрэгт татагдаж болохгүй гэж шүүмжлэгчид үзэж байгаа бол Ерөнхий сайдыг дэмжигчид, тэр дундаа Ликуд намынхан Биньямин Нетаньяхуг ардчилсан сонгуулиар сонгогдсон, албан тушаалаас нь огцруулж болохгүй гэж үзэж байгаа аж. 

Шүүхээс түүнийг буруутгаж тогтоол гаргасан ч Нетаньяху давж заалдах боломжтой бөгөөд давж заалдах хугацаанд тэрбээр албан тушаалаасаа огцрох шаардлагагүйн дээр давж заалдахад ихээхэн хугацаа шаардагдана гэж ажиглагчид үзсэн байна.

Г.Бямбасүрэн