Оросын Ерөнхийлөгч Владимир Путин өөрийгөө дахин хоёр удаа сонгогдох хуульд гарын үсэг зурсан талаар ВВС агентлаг мэдээлжээ. Энэ хуулийг мөн л Путин санал болгосон Үндсэн хуулийн нэмэлт өөрчлөлтийн дагуу баталсан гэнэ.
"ОХУ-ын Ерөнхийлөгчийн сонгуулийн тухай" Холбооны хуулийн 19-д зааснаар хоёр удаа улиран сонгогдсон эсвэл сонгууль товлох тухай албан ёсны шийдвэр нийтлэгдсэн өдөр хоёр дахь удаагаа ерөнхийлөгчийн албан тушаалыг хашиж байгаа Оросын иргэн дахин Ерөнхийлөгчөөр сонгогдох эрхгүй гэж заажээ.
Харин энэ заалт Путинд үйлчлэхгүй аж. Учир нь Үндсэн хуульд оруулсан нэмэлт өөрчлөлт хүчин төгөлдөр болох үед төрийн тэргүүний алба хашиж буй хүний ерөнхийлөгчөөр ажилласан хугацааг тооцохгүй гэж хуульд тусгасан байна. Ингээд Үндсэн хуулийн энэ нэмэлтийг баталжээ.
Владимир Путин 2000, 2004, 2012 болон 2018 онуудад Ерөнхийлөгчөөр сонгогдож байсан. Харин ийнхүү Үндсэн хуульд өөрчлөлт орсноор тэрбээр 2024 болон 2030 онуудад дахин нэр дэвших эрхтэй болжээ.
2008 оноос 2012 оны хооронд Дмитрий Медведев Ерөнхийлөгчөөр ажиллаж байх үед Путин Ерөнхийлөгчийн сонгогдон ажиллах хугацаа дөрөв байсныг зургаа болгох санал оруулж, ингээд энэ санал нь ч батлагдсан юм. Харин энэ өөрчлөлт Медведевт хамааралгүй, учир нь тэрбээр 2012 онд Ерөнхийлөгчийн албанаас буусан.
Гэнэтийн санал, гэнэтийн өөрчлөлт
Ерөнхийлөгчийн хугацааг тэглэх тухай нэмэлт өөрчлөлтийг өнгөрсөн оны гуравдугаар сарын 10-ны өдөр Төрийн думын хуралдааны үеэр Думын гишүүн Валентина Терешкова гэнэт л санал болгосон юм. Тухайн үед Үндсэн хуулийн шинэчилсэн найруулгаар Путин дахин нэр дэвших эрхгүй болоод байлаа.
Терешкова гэнэт л ийнхүү санал гаргасны дараа Путин нэн дару Дум руу орж ирэн, Үндсэн хуулийн шүүх дэмжиж, Үндсэн хуулийн нэмэлт өөрчлөлтийн талаарх олон нийтийн санал асуулгаар сонгогчид дэмжвэл өөрийнх нь ерөнхийлөгчөөр ажилласан хугацааг тэглэхтэй санал нэг байх болно гэж мэдэгдсэн юм. Ингээд Үндсэн хуулийн шүүх ч татгалзсангүй, олон нийтийн санал асуулга ч Путиний талд гарав.
Парламентыг тараах асуудлаар хэлэлцэж эхэлсэн Төрийн думын хурал гэнэт л ийнхүү Путиний ерөнхийлөгчөөр ажилласан хугацааг тэглэх асуудлыг хэлэлцсэнээр өндөрлөсөн юм. Терешковагийн гаргасан саналыг Үндсэн хуульд орох нэмэлт өөрчлөлтийн багцад оруулахаар тохиролцон, улмаар Төрийн дум болон Холбооны зөвлөл аль алин нь дэмжиж байлаа.
Энэ үйл явцыг дээд танхимын дарга Валентина Матвиенко тайлбарлахдаа "Цөмийн хүчин чадалтай агуу орон, дэлхийн тавцан дахь нөлөө бүхий олон улсын тоглогч. Хэн залгамжлах вэ,, аюулгүй байдал хэрхэх вэ гэх мэт асуудлууд нь ихээхэн түгшүүртэй явц" хэмээж байв.
Г.Бямбасүрэн