Ардчилсан намын 11 дүгээр ээлжилт бус цахим их хурлаас гаргасан тогтоолыг танилцууллаа. Тус намын ээлжит бус цахим их хурлаас намын удирдлагууддаа чиглэл өгсөн байна. АН-ын даргын сонгууль хоёр талд явагдаж, цахим санал хураалтаар М.Тулгат олонхийн санал авсан бол цаасан санал хураалтаар УИХ-ын гишүүн О.Цогтгэрэл олонхийн санал авсан. АН-ын дарга С.Эрдэнэ намын тамгыг олонхийн санал авсан М.Тулгатад гардуулан өгсөн билээ.

АН-ын дарга М.Тулгат: 

-АН-ын ээлжит бус цахим 11 дүгээр их хурлаар төлөөлөгчдийн санал гаргасны дагуу хоёр тогтоол баталсан. АН-ын үндсэн дүрмийн заалтыг үндэслэн, Монгол Улсын тусгаар тогтнол, эдийн засгийг баталгаажуулах үйлсэд гурав дахь хөршийн хөрөнгө оруулалтыг татах үйлсэд өндөр хувь нэмэр оруулсан АН-ын дарга асан М.Энхсайхан, Да.Ганболд, ҮБХ-ны гишүүн С.Баярцогт, Б.Болор,Б.Бямбасайхан, Д.Эрдэнэбат, Б.Ариунсан нарыг хилс хэрэгт хэлмэгдүүлэн, үзэл санааны хоригдол болгосон явдлыг их хурлын төлөөлөгчид бид гаднын гар хөл оролцсон хэлмэгдүүлэлт гэж үзэж байна. Эдгээр гишүүдийг олон улсын хүний эрхийн хорооны үзэл санааны хоригдлын жагсаалтад оруулах ажлыг АН хариуцан ажиллаж, цаашид хүний эрхийг зөрчихгүй үүднээс АТГ-ын хариуцсан мөрдөгч, нэр бүхий прокурор, нөлөөнд автсан шүүгчд болон тэдний гэр бүлийг АНУ болон европын улсад нэвтрүүлэхгүй байх хувийн хориг тавиулахыг ажил хэрэг болгохыг  АН-ын удирдлагад даалгасугай гэсэн. Хоёрдугаарт, Ерөнхийлөгчийг буруутгах тогтоол гаргасан. Монгол Улсын Ерөнхийлөгч Х.Баттулга нь АН-ын дотоод асуудалд хөндлөнгөөс оролцон, хагалган бутаргаж, Ерөнхийлөгчийн сонгууль тулаад байгаа энэ үед МАН-д үйлчилж байгааг их хурлын төлөөлөгчид буруушааж байна гэсэн тогтоолыг гаргалаа гэв. 

Н.Нягт