Америкийн Миннеаполист цагдаагийнхан өнгөт арьст эрийг машиндаа сууж байхад нь буудсаны улмаас тус улсад дахин эмх замбараагүй байдал дэгдсэн талаар Индепендент мэдээлжээ. 

Эх сурвалжийн мэдээлснээр, цагдаагийнхан гал нээсэн хэсэгт эсэргүүцэгчид цуглан, жагсаал тайван явагдсан ч зарим хүмүүс цадаагийн машин руу халдсан байна. Улмаар цугласан олныг тараахын тулд цагдаагийнхан нулимс асгаруулагч хий ашиглаж, хэргийн газар дээр олон цагдаа нэмж иржээ.

Цагдаагийнхны гарт амиа алдсан 20 настай Данте Райт цагдаагийнхан түүнийг зогсоох үед машиндаа өөр нэг бүсгүйтэй хамт явж байсан гэнэ. Амиа алдсан залуугийн ээжийн өгүүлснээр, энэ үеэр Райт утсаар ярин, цагдаагийнхан машиных нь агаар цэвэршүүлэгчээс болж зогсоосон хэмээн ярьсан аж. Удалгүй "Данте, битгий зугт" гэсэн үг , утсаа таслахыг цагдаагийнхан тушааж байгаа нь сонсогджээ. Хэдэн минутын дараа Райтын найз бүсгүй ээж рүү нь утсаар ярьж, хүүг нь цагдаагийнхан буудсан талаар өгүүлсэн байна.

Цагдаагийнхан болсон явдлын талаар мэдээлэхдээ, Райтыг баривчлах зөвшөөрөл олгосон байсан, түүнийг баривчлан саатуулах гэхэд машинд сууж зугатсан хэмээжээ. Цагдаагийнхан түүнийг буудсаны улмаас залуу эр газар дээрээ нас барсан бөгөөд одоо болсон явдлыг шалгаж байгаа гэнэ.

Энэ үйл явдал 46 настай өнгөт арьстан Жорж Флойдын үхэлтэй холбоотой шүүх хурал Миннеаполист явагдаж, тэнд нөхцөл байдал хүнд байгаа үед гарсан нь гал дээр тос нэмсэн хэрэг боллоо. Жорж Флойд тавдугаар сарын 25-ны өдөр баривчлагдсан бөгөөд түүнийг цагдаагийнхан баривчлах үеэрээ хүзүүн дээр нь дарсаны улмаас үхэлд хүргэсэн гэж үзэж байгаа. Энэ хэргийн дараа АНУ төдийгүй олон оронд арьс өнгөөр ялгаварлан гадуурхахын эсрэг хөдөлгөөн өрнөж, Америкт олон сарын туршид эмх замбараагүй байдал үргэлжилсэн юм.