Эрдэмтэд энэтхэг штаммын шинж тэмдгүүдийг нэрлэжээ
2021-06-16 09:50

Коронавирусийн энэтхэг хувилбарын үед ходоод гэдэсний замтай холбоотой өөрчлөлтүүд илүүтэй ажиглагдах бол ханиалга, халуурах шинж тэмдэг ховор илэрдэг гэнэ. Энэ талаар Оросын хэрэглэгчийн хяналтын газрын Тархвар судлалын эрдэм шинжилгээ, судалгааны төвийн орлогч захирал Наталья Пшеничная мэдэгдсэнийг РИА Новости дамжуулжээ. 

 

"Коронавирусийн халдварын бүхий л шинж тэмдгүүд нь өвөрмөц биш, 70-80 хувьд үнэрлэх мэдрэмжээ алдах зэрэг түгээмэл шинж тэмдгүүд илэрдэг. Коронавирусийн шинэ штаммууд илэрсэнтэй холбоотойгоор өмнө нь зонхилж байсан эмнэлзүйн шинж тэмдгүүдэд зарим өөрчлөлт гарч байгаа нь ажиглагдаж байна" хэмээн Пш?ничная өгүүлжээ.

 

Түүний өгүүлснээр, энэтхэг хувилбараар халдварласан үед гэдэс өвдөх, хоолны дуршилгүй болох, дотор муухайрах, бөөлжих, түүнчлэн үе мөч өвдөх болон сонсгол муудах гэсэн шинж тэмдгүүд илэрч байгаа гэнэ. Бусад орнуудын эрдэмтдийн мэдээллээр, энэтхэг хувилбарын үед халуурах болон ханиалгах шинж тэмдэг ховор ажиглагдаж байгаа бол үнэрлэх мэдрэмжээ алдах нь ч түгээмэл биш байгаа гэж Пшеничная онцолжээ. 

 

Өмнө нь, зургадугаар сарын 11-ний өдөр Лондонгийн Хатан хааны коллежийн эрдэмтэд мэдэгдэл хийхдээ толгой өвдөх, нус гоожих, хоолой өвдөх зэрэг нь коронавирусийн халдвартай өвчтөнүүдэд илэрч байгаа хамгийн түгээмэл шинж тэмдгүүд болж байгааг онцолж байсан юм. Тэдний өгүүлснээр коронавирусийн энэтхэг хувилбар нь бараг шинж тэмдэг илэрдэггүй энгийн ханиадтай төстэй байгаа гэнэ. 

 

Английн Эрүүл мэндийн газрын мэдэгдсэнээр, коронавирусийн энэтхэг штамм буюу Дельта хувилбар нь Европт цар тахлын гурав дахь давалгааг үүсгэсэн британи штаммаас 60 хувиар илүү халдварлах чадвартай аж. Дельта хувилбараас хамгаалах гол арга нь бүрэн дархлаажуулалт гэж Английн эрдэмтэд цохон тэмдэглэж байна. 

 

Г.Бямбасүрэн

Shuud.mn
Сонин хачин