Энэ оны эхний таван сарын гүйцэтгэлийг гаргажээ. эгдсэн төсвийн тэнцвэржүүлсэн тэнцэл: 866.3 тэрбум төгрөгийн алдагдалтай байна. 2021 оны 5 дугаар сарын байдлаар нэгдсэн төсвийн тэнцвэржүүлсэн тэнцлийн алдагдал өмнөх оны мөн үеэс 712.5 тэрбум төгрөгөөр, төлөвлөсөн дүнгээс 1,337.6 тэрбум төгрөгөөр тус тус буурсан байна.

Нэгдсэн төсвийн тэнцвэржүүлсэн орлого 5,305.8 тэрбум төгрөг болж, орлогын төлөвлөгөө 201.6 тэрбум төгрөгөөр давж биелсэн бол өмнөх оны мөн үеэс 1,962.4 тэрбум төгрөг буюу 58.7 хувиар нэмэгдсэн байна.

Нэгдсэн төсвийн тэнцвэржүүлсэн орлого төлөвлөснөөс 4.0 хувь 201.6 тэрбум төгрөгөөр давж биелэхэд татварын орлого 2.2 хувь буюу 102.3 тэрбум төгрөгөөр дутуу биелсэн хэдий ч татварын бус орлого 69.3 хувь буюу 303.9 тэрбум төгрөгөөр давж биелсэн нь нөлөөлжээ.

Тайлант хугацаанд нийгмийн даатгалын орлого, нэмэгдсэн өртгийн албан татварын орлого төлөвлөснөөс давж биелсэн бол бусад төрлийн татварын орлого 0.8-25.6 хувиар төлөвлөснөөс дутуу биелэлттэй гарчээ. Татварын бус орлогын төлөвлөгөө 2021 оны эхний 5 сарын гүйцэтгэлээр 303.9 тэрбум төгрөгөөр давж биелснээр 169.3 хувийн гүйцэтгэлтэй гарсан нь хувьцааны ногдол ашиг, торгуулийн орлого, газрын тосны орлого болон бусад орлого төлөвлөснөөс давж биелсэнтэй холбоотой байна. Тайлант хугацаанд нэгдсэн төсвийн нийт зарлага 6,172.1 тэрбум төгрөг болж 1,136.0 тэрбум төгрөгийн дутуу зарцуулалттай буюу 84.5 хувийн гүйцэтгэлтэй гарчээ.

Нэгдсэн төсвийн нийт зарлагын гүйцэтгэлийг тайлант хугацааны төлөвлөгөөтэй харьцуулахад 15.5 хувиар дутуу зарцуулагдсан ч өмнөх оны мөн үетэй харьцуулахад 25.4 хувиар буюу 1,249.9 тэрбум төгрөгөөр өссөн байна. Улсын төсвийн хөрөнгөөр хэрэгжүүлэх төсөл, арга хэмжээ 2021 оны эхний 5 сарын байдлаар 42.2 хувийн гүйцэтгэлтэй гарч 186.6 тэрбум төгрөгийн санхүүжилт олгогдсон бол концессын эргэн төлөлтөд 82.1 тэрбум төгрөг зарцуулж 60.9 хувийн гүйцэтгэлтэй гарсан байна.

Зээлийн үйлчилгээний төлбөр өнгөрсөн оны мөн үеэс 3.9 тэрбум төгрөгөөр буюу 1.2 хувиар нэмэгдсэн бол тайлант хугацааны төлөвлөсөн дүнгээс 58.4 тэрбум төгрөгөөр буюу 14.6 хувийн дутуу гүйцэтгэлтэй гарсан байна.

Н.Нягт