Оросын Шинжлэх ухааны академийн Нүүрс, нүүрсний химийн холбооны судалгаганы төвийн хүрээлэнгийн эрдэмтдийн ололт нүүрс олборлолтын салбарт нэн чухал нүүрсний давхаргын боловсруулалтыг хоёр дахин сайжруулах гэнэ. Энэ талаар тус хүрээлэнгийн Эрдэм шинжилгээ хариуцсан орлогч захирал Алексей Стародубов ТАСС агентлагт мэдээлжээ. 

"Өнөөдөр томоохон нүүрсний давхаргуудыг боловсруулахдаа дээд тал нь л нөөцийн тал хувийг олборлодог. Аюулгүй ажиллагааны үүднээс одоогийн арга үүнээс илүү олборлох боломж олгодоггүй юм. Харин манай технологи давхаргыг бүхэлд нь авах боломж олгоно, энэ технологи роботжсон тул аюултай бүсүүдэд хүмүүс ажиллахгүй юм" хэмээн Стародубов өгүүлжээ. Түүний өгүүлснээр, эрдэм шинжилгээ, судалгааны төвд бүтээсэн роботжсон комплексийн туршилтын загвар нь газар доор хүний оролцоогүйгээр ажиллах боломжтой гэнэ.

Энэ төслийг "Кузбасс" эрдэм шинжилгээ, боловсролын төвийн хүрээнд хэрэгжүүлж байгаа бөгөөд "Цэвэр нүүрс-Ногоон Кузбасс" инновацийн шинжлэх ухаан техникийн цогц хөтөлбөрийн бүрэлдэхүүнд багтжээ. Энэ хөтөлбөрт Кузбассын 22 их дээд сургууль, эрдэм шинжилгээний хүрээлэнгүүд багтаж байгаа бөгөөд тэд хамтдаа Кузбассын нүүрс олборлолтын салбарын тэргүүлэгч зорилтуудыг шийдвэрлэхэд шинжлэх ухааныг ашиглах зорилготойгоор ажиллах юм байна.

Энд дуулгахад, өнөөдөр Кузбасст Оросын нүүрсний талаас илүү хувийг олборлож байгаа юм. Энэ бүс нутагт 150 гаруй уурхай, нүүрс баяжуулах үйлдвэрүүд ажилладаг бөгөөд эдгээр уурхай, үйлдвэрт өндөр нэмүү өртөг шингэсэн нүүрс боловсруулах боломжийг олгох шинэ технологи шаардлагатай гэж Оросын эрх баригчид үзэж байгаа юм.

Улмаар, "Цэвэр нүүрс-Ногоон Кузбасс" эрдэм шинжилгээний төслүүдийг хэрэгжүүлснээр бүс нутгийн нүүрсний салбарыг хөгжүүлэх төдийгүй Кузбасст шинэ өндөр технологийн 1,5 мянган ажлын байр бий болгоно гэж тооцоолж байгаа юм байна.

Г.Бямбасүрэн