Боловсрол шинжлэх ухааны сайд Л.Энх-Амгалан MN25 телевизийн "Ам нээвэл" ярилцлагын нэвтрүүлэгт оролцохдоо "Яамны ажил цөөн хэдхэн сэтгэлтэй, чадварлаг хүний нуруун дээр явдаг юм байна. Манай яамны 122 хүнээс 30 нь ажлын ачаалалгүй, чадваргүй байна. Надад хоёр туслах, хоёр зөвлөх хэрэггүй. Дэд сайд, Төрийн нарийн бичгийн дарга хоёр тус тусдаа нарийн бичигтэй байх шаардлагагүй. Яамны ажил хийдэггүй 30 хүнээс илүү 30 сайн багш хэрэгтэй. Хэмнэсэн мөнгөөр тэдний цалинг нэммээр байна" хэмээн яамандаа хийж буй бүтцийн өөрчлөлтийн талаар ярьжээ.

Товчхондоо боловсролын сайд ширээ сандал бөглөж суугаад төрөөс цалин авдаг хүмүүсийг цэвэрлэж эхэлжээ. Энэ бол төрийн албаны шинэчлэл. Бусад яамдад ч ийм амьгүй албат байж л байгаа. Тиймээс бусад сайд нар Л.Энх-Амгалан сайдын гаргасан шинэчлэлийг үргэлжлүүлж, төрийн албыг цэвэрлэх, шинэчлэх ажилд нэгдээсэй. Нэг намын, нэг даргын халаасны хүмүүс төрд өчнөөн бий. Зарим нь бүр зөвхөн өөрт нь зориулж бий болгосон албан тушаалд шигдэж буй. 

Хоёр хоногийн өмнө төр, хувийн хэвшлийн уулзалт болох үеэр Ерөнхий сайд Л.Оюун-Эрдэнэ төрийн албан хаагчдын тоон мэдээллийг танилцуулсан. Монголын төрд төсвөөс цалинждаг 198 мянган албан хаагч байна. Тэдэн дээр ИТХ, ТӨК, орон нутгийн өмчид үйлдвэрийн газрын албан хаагчдыг нэмэхээр энэ тоо 285 900 болж, бараг 300 мянга дөхөж байна. Ийм олон хүн ажилладаг төрийн алба яагаад иргэдээс тийм хол, тийм хүртээмжтэй юм бэ.

Энэ тухай үе үеийн сайд, дарга ярьдаг ч хэн ч төрийн албыг чадварлаг цомхон бүтэцтэй болгох ажлыг эхлүүлээгүй. Харин Л.Энх-Амгалан сайд зоригтой шийдэл гаргаж, цэвэрлэгээг эхэлсэн байна. Тэр туслах, зөвлөх нэртэй хүмүүсээс татгалзаж, зөвхөн шагнал хариуцдаг мэргэжилтэнгүй байсан ч төрийн ажил явна хэмээн үзлээ. Харин одоо бусад сайд нар ч зоригтой шийдэл, шийдвэр гаргах хэрэгтэй байна. Хэдийг хүртэл татвар төлөгчдийн мөнгөөр чадваргүй, сэтгэлгүй, суудал бөглөгчдийг тэжээх билээ!

В.Бат