Тайвань улс "Хятадын аюул заналд" хариу өгөхөд бэлэн бөгөөд ардчилсан хэв маягаа хамгаална гэж тус улсын Ерөнхийлөгч Цай Инвэнь мэдэгдсэн талаар ВВС агентлаг мэдээлжээ. 

Тайвань улс түрэмгий үйлдэл гаргахгүй ч "Хятад бидэнд зориулсан замаар Тайванийг явуулахыг хэнээр ч албадуулахгүйн тулд" батлан хамгаалахаа бэхжүүлнэ гэж Цай Инвэнь мэдэгдсэн байна. "Бид хүчирхэг болохын хэрээр Хятадын зүгээс ирэх дарамт хүчтэй болно" хэмээн тэрбээр мэдэгджээ.

Хятадын цэргийн онгоцууд Тайванийн агаараас эсэргүүцэн хамгаалах бүсэд нислэг үйлдэж байгаа нь үндэсний аюулгүй байдал, нисэх хүчний аюулгүй байдалд ноцтой нөлөөлж, сүүлийн 72 жилд тохиогоогүй төвөгтэй нөхцөл байдлыг үүсгэсэн гэж Тайванийн Ерөнхийлөгч онцолсон байна. Түүнчлэн тэрбээр Хятадын удирдлагуудтай тэгш эрхийн үндсэн дээр хэлэлцээ хийх саналаа дахин тавьжээ.

Энд дуулгахад, өнгөрсөн долоо хоногт Хятад улс Тайванийн агаараас эсэргүүцэн хамгаалах бүс рүү олон тооны байлдааны онгоцоо илгээсэн байна. Хэдийгээр Хятадын онгоцууд арал руу хүрээгүй ч хурцадмал нөхцөл байдалд хэн нэгэн алдаа гарган буудах эрсдэл бий гэж Тайванийн Батлан хамгаалахын сайд Чиу Куо Чен мэдэгдэж байлаа.

Түүнчлэн тэрбээр БНХАУ 2025 онд Тайвань руу довтлохоор төлөвлөж байна хэмээн таамаглаж байв. Тайванийн Батлан хамгаалахын сайдын өгүүлснээр БНХАУ техникийн хувьд одоо ч дайралт хийхэд бэлэн байгаа, ойрын ирээдүйд халдаж болзошгүй гэнэ. Тэрбээр ийм таамаглалаа ямар баримт дээр тулгуурлан гаргасан талаараа тайлбарлаагүй байна.

Г.Бямбасүрэн