Монголын улс төрч "100 грамм"-аар асуудлыг шийдэхийг дэлхийн удирдагчдад санал болгосон талаарх мэдээллийг Оросын РИА Новости болон бусад томоохон хэвлэлүүд дамжуулжээ. 

Дайнаас зайлсхийхийн тулд дэлхийн удирдагчид архи барин бункерт орох саналыг Монголын Парламентын гишүүн, Европын Аюулгүй байдал, хамтын ажиллагааны байгууллагын Парламентын чуулган дахь Монголын төлөөлөгчдийн тэргүүн Дамдины Цогтбаатар гаргасан хэмээн РИА Новости мэдээлсэн байна. 

"Шилэн аяганд архи хийгээд, ямар нэг бункерт орчих. Тэгээд хэл амаа ололцтол тэндээсээ битгий гар. Хоёр лонхны дараа та бүхэн найзууд болоод гарч ирнэ гэдэгт би итгэлтэй байна. Өнөөгийн ертөнцөд сайн сайхан зүйл бүгдэд хүрэлцээтэй" хэмээн тэрбээр "Валдай" мэтгэлцээний клубийн хурлын үеэр хэлсэн гэж эх сурвалж мэдээлжээ. 

Эх сурвалжийн мэдээлснээр, том гүрнүүд хэл амаа ололцохыг жижиг орнууд зүгээр л хүлээгээд суугаад байж чадахгүй гэж Д.Цогтбаатар өгүүлсэн гэнэ. "Манай орон зүгээр л нэг алга болчихыг бид хүсэхгүй байна" хэмээн Д.Цогтбаатар онцолсон байна. 

Энэ өдрүүдэд Оросын Сочи хотноо "Валдай" олон улсын мэтгэлцээний клубийн 18 дахь удаагийн хурал болж байгаа юм. Оросын төдийгүй гадаад орнуудын шинжээчдийн оролцсон арга хэмжээ 10 дугаар сарын 18-ны өдөр эхэлсэн, дөрвөн өдрийн туршид үргэлжлэх юм байна.

Г.Бямбасүрэн