Америкийн рэпер Янг Дольф амиа алджээ. Түүнийг Теннесси мужийн Мемфис хотод буудан хөнөөсөн талаар Фокс Ньюс агентлаг мэдээлжээ. 

Эх сурвалжийн мэдээлснээр, дуучныг дэлгүүрийн орчимд байхад нь буудсан байна. Дольф руу дэлгүүр рүү ойртож ирсэн автомашинаас үл таних хүмүүс буудсан гэж дэлгүүрийн ажилтнууд цагдаагийнханд мэдүүлжээ.

Янг Дольф буюу Адольф Роберт Торнтон 1985 оны долдугаар сарын 27-ны өдөр Чикагод төрсөн. Түүнийг хоёр настай байхад гэр бүл нь Мемфис хотод шилжин иржээ. Тэрбээр 2016 онд King of Memphis нэртэй анхны цомгоо гаргаж байсан нь Билборд чартад 49 дүгээр байранд орж байв. Харин 2020 онд гаргасан Rich Slave нэртэй долоо дахь цомог нь түүний уран бүтээлийн замналын хамгийн амжилттай төсөл болж, Билборд жагсаалтад дөрөвдүгээрт бичигдэж байлаа. 

Янг Дольфын амь насанд халдах оролдлого өмнө нь ч гарч байсан гэнэ. 2017 онд Лос-Анжелесийн нэгэн дэлгүүрийн орчимд байхад нь түүн рүү бууджээ. Рэперийн бие нэн хүнд байдалтай эмнэлэгт хүргэгдсэн бөгөөд харин хэдэн цагийн дараа эмч нар түүнийг амьд үлдэнэ гэж мэдэлж байв. Янг Дольф эмнэлэгт хоёр долоо хоног хэвтэн, галт зэвсэгийн гурван шархаа эдгээж байжээ.

Г.Бямбасүрэн