Энэтхэгт омикрон штаммын халдвар авсан хоёр тохиолдол илэрчээ. Энэ талаар тус улсын Эрүүл мэндийн яамны төлөөлөгч Лав Агарвал мэдэгдсэнийг Известия дамжуулсан байна. 

"Одоогоор манай улсад омикрон штаммын халдварын хоёр тохиолдол бүртгэгдлээ. Хоёр тохиолдол хоёулаа Карнатака мужид илэрсэн" хэмээн ЭМЯ-ны төлөөлөгч мэдэгдсэн байна. 

Эдгээр нь тус улсад бүртгэгдсэн анхны тохиолдол бөгөөд халдвар авсан хүмүүс нь 46, 66 насны эрэгтэй гэнэ. Энэтхэгийн эмнэлгийн судалгааны зөвлөлийн Ерөнхий захирал Балрам Бхаргавын мэдээлснээр, вирусийн геномыг судалдаг улсын 37 лабораторийг өөртөө багтаасан SARS-CoV-2 геномикийн консорциумд хийсэн шинжилгээ судалгааны дүнд дээрх тохиолдлууд нь омикрон штаммаар үүсгэгдсэн гэдгийг олж тогтоосон байна.

Г.Бямбасүрэн