Омикрон штамм коронавирусийн халдвар аваад эдгэрсэн хүмүүст халдварлах эрсдэл бусад мутациудтай харьцуулахад гурав дахин их гэнэ. Ийм дүгнэлтийг ӨАБНУ-ын Тархвар судлалын загварчлал, шинжилгээний төв болон Халдварт өвчний үндэсний хүрээлэнгийн эрдэмтэд гаргажээ. 

"Омикрон штамм нь коронавирусийн өмнөх хувилбаруудын халдвар авсны дараа үүсэх дархлааг сөрөх боломжтой гэдэг нь судалгааны мэдээллээс харагдаж байна" хэмээн судалгаанаас иш татан Ройтерс агентлаг мэдээлсэн байна. Халдварт өвчний үндэсний хүрээлэнгийн эрдэм шинжилгээний ажилтан Энн фон Готтбергийн өгүүлснээр коронавирусийн халдвар хүндрэхээс хамгаалах цорын ганц арга нь вакцинд хамрагдах явдал гэнэ.

Эргэн сануулахад, коронавирусийн шинэ штамм Өмнөд Африкт анх илэрсэн юм. Дэлхийн эрүүл мэндийн байгууллага энэ хувилбарыг "санаа зовоохуйц" гэж ангилж, "омикрон" хэмээн нэрлэсэн. Шинэ штамм нь олон мутацитайн дээр дельта штаммаас хурдан халдварлах чадвартай байж болзошгүй гэж мэргэжилтнүүд таамаглаж байгаа юм. 

Г.Бямбасүрэн