Афганистаны засгийн газрын албан ёсны төлөөлөгч Забихулла Мужахид эмэгтэйчүүдийн эрхийн талаарх захирамж гаргажээ. 

"Эмэгтэйчүүдийн эрхийн тухай Амир аль-Момениний тусгай захирамж" хэмээх гарчигтай энэ баримт бичигт Афганистаны эмэгтэйчүүдийн гэрлэлт, өмчийг зохицуулсан дүрэм багтсан байна.

Тэр дундаа "эмэгтэйчүүдийг гэрлэлтэд албадаж болохгүй, бэлэвсэн эмэгтэй нас барсан нөхрийнхөө өмчийн хувийг эзэмших эрхтэй" гэж заажээ. Энэ дүрмийг шүүгчид шийдвэр гаргахдаа баримтлах бол Шашин, мэдээллийн яам эдгээр эрхийг сурталчлах ёстой гэж захирамжид тусгасан байна. Гэхдээ эмэгтэйчүүд боловсрол эзэмших, ажил эрхлэх талаар тусгагдаагүй гэж АР агентлаг дамжуулжээ.

Энд дуулгахад, энэ оны наймдугаар сард Талибан хөдөлгөөн Афганистаны төрийн эрхийг гартаа авсан даруйдаа эмэгтэйчүүдийг эрчүүдтэй зэрэгцэн нэг танхимд сууж хичээллэхийг хориглож, орон нутгийн захиргаан дахь эмэгтэйчүүдийг гэрээсээ гарахгүй байхыг үүрэг болгож байв. Талибууд эмэгтэйчүүдийн суралцах, ажиллах эрхийг боомилж байгаа энэ үйлдлээ "тэдний аюулгүй байдлыг бодолцсон шийдвэр" хэмээн тайлбарлаж байлаа. 

Г.Бямбасүрэн