Бээжин хотод тун удахгүй өвлийн олимпын наадам нээлтээ хийнэ. Өвлийн олимпын наадамд бэлтгэн Хятадын эрх баригчид коронавирусийн халдварын дэгдэлт гаргахгүйн тулд хатуу арга хэмжээ авсаар байгаа юм. Энэ удаад Олимпын үеэр мөрдөх анхааруулгыг Бээжингийн оршин суугчдад мэдээлжээ. 

Тодруулбал, Олимпын тээврийн хэрэгсэлтэй аливаа байдлаар харьцах, ийм тээврийн хэрэгслүүд зам тээврийн осолд орсон байсан ч тусламж үзүүлэх гэж оролдохгүй байхыг Бээжингийн оршин суугчдад уриалжээ.

Олимпын тамирчид, дасгалжуулагчид, албан тушаалтнуудыг тээвэрлэн яваа автомашинтай мөргөлдсөн бол Бээжингийн оршин суугчид тухайн олимпын тээврийн хэрэгслийн жолооч болон зорчигчийг тээврийн хэрэгслээс гаргахгүй, харин ослын газарт мэргэжлийн хүмүүс ирэх хүртэл тус тусын тээврийн хэрэгсэлдээ хүлээх ёстой гэнэ.

Ийм мэдэгдлийг Бээжингийн замын хөдөлгөөний зохион байгуулалтын хотын товчоо хийжээ. Ингэснээр коронавирусийн халдвар тархах эрсдлийг бууруулж чадна гэж үзэж байгаа аж. Түүнчлэн Олимпын бэлгэдэл бүхий автомашинуудад зам тавьж өгөх, зам тээврийн осол, хэрэг гарсан бол хүн хоорондын зай баримтлахыг анхааруулжээ. 

Г.Бямбасүрэн