Хамтын аюулгүй байдлын гэрээний байгууллагын гишүүн болох Казахстан улсын Ерөнхийлөгч улс оронд нь эмх замбараагүй байдал үүссэнтэй холбоотойгоор тус байгууллагаас дэмжлэг хүсэн, улмаар ХАБГБ-ын энхийг сахиулагчид Казахстанд ирэн үүрэг гүйцэтгэж байгаа юм. Эдгээр энхийг сахиулагчид Казахстанаас хэзээ гарах талаар Токаев мэдэгдэл хийжээ.
Тодруулбал, ХАБГБ-ын энхийг сахиулах хүчнийг гаргах ажил хоёр хоногийн дараагаас эхлэн, 10 өдөр үргэлжилнэ гэж Казахстаны Ерөнхийлөгч Касым-Жомарт Токаев мэдэгджээ.
"ХАБГБ-ын энхийг сахиулах хүчний үндсэн зорилт амжилттай хэрэгжсэн. Хоёр өдрийн дараагаас энхийг сахиулагчдыг шат дараатай гаргаж эхэлнэ. Энхийг сахиулагчдыг гаргах ажил 10 хоног үргэлжилнэ" хэмээн Токаев парламентад хэлсэн үгэндээ онцолжээ.
Энхийг сахиулагчид
Одоо Казахстанд Хамтын аюулгүй байдлын гэрээний байгууллагын энхийг сахиулагчид үүрэг гүйцэтгэж байна. Энэ байгууллагад Казахстан улс гишүүн орныхоо хувиар нэгдүгээр сарын тавны өдөр дэмжлэг хүсэн хандсан. Ингээд ХАБГБ Казахстан руу энхийг сахиулагчдыг илгээхээр болсноор нэгдүгээр сарын зургааны өдрөөс эхлэн Оросын цэргүүд Казахстаныг зорьсон юм. Энхийг сахиулагчид нэн чухал цэргийн, төрийн, нийгмийн объектуудыг хамгаалах бөгөөд тус улсад нөхцөл байдал тогтворжих хүртэл үүрэг гүйцэтгэнэ гэж мэдээлж байлаа.
Казахстанд үүрэг гүйцэтгэж буй энхийг сахиулагчид
Казахстанд нийт 2,5 мянган хүний бие бүрэлдэхүүнтэй энхийг сахиулах ажиллагаа явагдана.
ОХУ-ын зэвсэгт хүчнээс 1950
Беларусийн Зэвсэгт хүчнээс 100
Киргизийн Зэвсэгт хүчнээс 150
Арменийн Зэвсэгт хүчнээс 100
Тажикистаны Зэвсэгт хүчнээс 200 цэргийн алба хаагч оролцож байгаа бөгөөд эдгээр орнуудын цэргийн алба хаагчид нь голчлон агаарын десант болон гвардын десантын дивизийнхэн байгаа юм.
Г.Бямбасүрэн
Уншиж байна |