АНУ-ын Ерөнхийлөгч Жо Байден төрийн тэргүүний албан тушаалд ажилласныхаа нэг жилийн ойг тохиолдуулан хэвлэлийн бага хурал зохион байгуулсан байна. Тэрбээр энэ үеэр олон сэдвээр ярьсны дотор Украин, Оросын харилцааны сэдвийг ч хөнджээ. 

Өнгөрсөн жилийн намраас эхлэн барууны хэвлэлүүдээр ОХУ Украины хилийн орчимд цэргээ татан төвлөрүүлэх болсон нь Украин руу довтлохоор төлөвлөж байгаагийн илрэл гэсэн мэдээлэл гарч, барууны орнууд үүнд санаа зовниж байгаагаа илэрхийлэн олон талт яриа хэлэлцээр хийж байлаа. АНУ болон ОХУ-ын цахим дээд хэмжээний уулзалтын үеэр ч энэ сэдэв хөндөгдөж байлаа. 

Жо Байден хэвлэлийн бага хурлын үеэр мэдэгдэл хийхдээ Украиныг тойрсон нөхцөл байдал хурцадсан тохиолдолд Оросын Ерөнхийлөгч Владимир Путин "урьд хожид хэзээ ч хараагүй" хориг арга хэмжээ авна гэж сүрдүүлжээ. Мөн Оросын эрх баригчид цаашдын үйлдлээ эцэслэн шийдээгүй, Путиний өмнө дипломат ёс эсвэл сөргөлдөөн гэсэн сонголт үлдсэн хэмээн Байден онцолсон байна. 

Украин руу Орос халдаж болзошгүй аюул занал байгаа талаарх сэтгүүлчийн асуултад тэрбээр "Тэр хөдөлж эхлэх байх гэж би бодож байна. Тэр ямар нэг зүйл хийх ёстой" хэмээн Байден мэдэгджээ.

Үүний зэрэгцээ Баруунтай дайн дэгдээхийг Путин хүсэхгүй гэж тэрбээр үзэж байгаагаа илэрхийлжээ. Харин Украин руу халдвал Оросын хувьд сүйрэл болно гэж Байден мэдэгдсэн байна. 

"Тэд дайрвал төлөөсөө төлнө. Тэдний банкууд доллартай харьцах боломжгүй болно" хэмээн Байден өгүүлээд эдийн засгийн хориг арга хэмжээг ихээр авч хэрэгжүүлнэ гэж онцолжээ. 

Эргэн сануулахад, өнгөрсөн оны 10 дугаар сараас эхлэн Оросын цэргүүд Украины хил орчим олноор байрлаж байгаа талаарх мэдээлэл гарах болсон. Харин үүнийг Оросын тал "цэргийн сургуулилалт" хэмээн нэрлээд "өөрийн нутаг дэвсгэр дээр цэргээ шилжүүлэх бүрэн эрхтэй" гэж удаа дараа мэдэгдэж байв. 

Г.Бямбасүрэн