Орос Украин руу халдаж болзошгүй гэсэн болгоомжлолоос үүдэн АНУ болон Британи дипломатуудынхаа гэр бүлийнхнийг Украинаас гаргахаар болсон. Харин Швед улс ийм алхам хийхгүй гэнэ. 

Тодруулбал, Швед улс Украин руу аливаа төрлийн зэвсэг нийлүүлэхгүй, түүнчлэн Киевээс дипломат төлөөлөгчийн газруудынхаа ажилтнуудыг нүүлгэн шилжүүлэх төлөвлөгөөгүй байгаа гэж Шведийн Гадаад хэргийн сайд Анн Линде мэдэгджээ. 

Швед улс зэвсэг экспортлох хатуу журамтай гэж сайд мэдэгдээд Швед улс сөргөлдөөний байдалд байгаа улс орон руу зэвсэг экспортлодоггүй гэдгийг цохон тэмдэглэсэн байна. Гэхдээ шинэчлэлийн салбарт Киевт тусламж үзүүлэх, цахим аюулгүй байдлын асуудлаар хамтран ажиллахад бэлэн байгаагаа илэрхийлжээ.

Мөн бусад орны адил Украинаас дипломатуудаа нүүлгэн шилжүүлэхээр төлөвлөөгүй гэж Гадаад хэргийн сайд мэдэгдсэн байна.

Г.Бямбасүрэн