Оюутолгойн гүний уурхайн үйлдвэрлэлийн эхний үе шат эхэлж, өчигдөр анхны тэсэлгээг хийлээ. Монгол Улсын эдийн засагт түүхэнд тооцогдох энэ үйл явдлын талаар олон нийтийн сүлжээний хэрэглэгчид өөр өөрийн байр суурийг илэрхийлж, зарим нь Оюутолгойг эхлүүлсэн Ерөнхий сайд нарт талархал илэрхийлсэн бол нөгөө хэсэг нь үргэлжлүүлсэн Засгийн газрын тэргүүнд баяр хүргэж байлаа. 

Ерөнхий сайд асан С.Баяр

Оюутолгой төсөл шиг энэ том үйлсийг ганц хүн, ганц нам, ганц далайлтаар бүтээнэ гэж үгүй. Дутууг гүйцээж, дундуурыг дүүргэсэн дүү нартаа, Л.Оюун-Эрдэнэ ерөнхий сайд, түүний Засгийн газрын сайд нар, УИХ-ын эрхэм гишүүд, Оюутолгойд ажиллаж буй бүх хүмүүст гүн талархал илэрхийлъе! Монгол Улс маань мандан бадраг!

Ерөнхий сайд Л.Оюун-Эрдэнэ

Оюу Толгой төслийн гүний уурхайн үйлдвэрлэлийн анхны тэсэлгээг эхлүүллээ. Оюу Толгой төсөл дэх Монгол Улсын Засгийн газрын эзэмшлийн 34 хувьд ногдох 2.3 тэрбум ам.долларын өрийг 100 хувь тэглэж, ирээдүйд тооцогдох 22 тэрбум ам.долларын өр үүсэхгүй байх нөхцөлийг өнөөдөр баталгаажууллаа.

Мөн Гүний уурхайн үйлдвэрлэлийг эхлүүлэх анхны тэсэлгээг Рио Тинто компанийн гүйцэтгэх захирал Якоб Стаусхольмын хамт гүйцэтгэв.

Гүний уурхай бүрэн ашиглалтад орсноор Монгол Улс дэлхийд тавд эрэмбэлэгдэх өндөр технологийн гүний уурхайтай болж, олон улсын зах зээлд зэсийн томоохон тоглогчдын нэгд тооцогдож, Монгол Улсын эдийн засаг болон төсөвт оруулах үр өгөөж багадаа гурав дахин нэмэгдэх боломжтой.

Шинэ сэргэлтийн бодлогын хүрээнд цаашид хөрөнгө оруулагчид, аж ахуйн нэгжүүдтэй харилцан ашигтай идэвхтэй түншлэн ажиллахад Монголчууд бид бэлэн гэдгээ хөрөнгө оруулагчдад илэрхийлье!

2009 онд Оюутолгой төслийг эхлүүлсэн Ерөнхий сайд асан С.Баяр, 2022 онд үргэлжлүүлж буй Ерөнхий сайд Л.Оюун-Эрдэнэ нар ийм байр суурийг илэрхийлж байна. Харин 2015 онд Оюутолгой төслийн далд уурхайн бүтээн байгуулалт, санхүүжүүлтийн төлөвлөгөө /Дубайн гэрээ/-г байгуулсан Ерөнхий сайд асан Ч.Сайханбилэг энэ удаа дуугарсангүй. Тэрбээр Загсийн газар, хөрөнгө оруулагчдын хэлэлцээ үргэлжилж байхад далд уурхайн бүтээн байгуулалтыг эхлүүлсэн талаар өөрийн байр суурийг илэрхийлж байсан ч өчигдөр ам нээсэнгүй. 

Монгол Улсын эдийн засгийн хоёр дахь хөдөлгөгч хүч болсон Оюутолгой төсөл тасралтгүй үргэлжлэх нь туйлын чухал. Тиймдээ ч Ерөнхий сайд Л.Оюун-Эрдэнэ хөрөнгө оруулагчдад хандан "Оюу толгойн Гүний уурхайн бүтээн байгуулалт эхэлж байгаа энэ өдөр бол хөрөнгө оруулагч талд дахин итгэл хүлээлгэж буй Монголын ард түмний чин эрмэлзэл, магадгүй сүүлчийн найдлага"  гэдгийг тодорхой хэлсэн юм.

Б.Хэрлэн