Оросын төрийн телевиз болох “Первый канал” сувгийн “Время” мэдээллийн хөтөлбөрийн үеэр тус телевизийн нэгэн ажилтан дайныг эсэргүүцжээ.
Тодруулбал, мэдээллийн хөтөлбөрийн хөтлөгч Екатерина Андреева мэдээ хүргэж байх үеэро түүний ард нэгэн эмэгтэй гарч ирэн, “Дайныг зогсоо, суртал ухуулгад битгий итгэ, та нарт худлаа ярьж байна” гэсэн бичиг барин зогссон байна. Тус телевиз болсон хэргийг шалган, улмаар энэ эмэгтэйд хариуцлага тооцохоор болсон талаар ТАСС агентлаг мэдээлжээ.
The Insider сайтын мэдээлснээр, шууд эфирийн үеэр дайныг эсэргүүцсэн эмэгтэй нь “Первый канал” сувагт редактороор ажиллаж байсан Марина Овсянникова аж. Урьдчилсан мэдээллээр, түүнийг Оросын зэвсэгт хүчний нэр хүндэд халдсан гэж үзэн Захиргааны хэрэг зөрчлийн хуулийн дагуу хариуцлагад татахаар болсон гэнэ.
Марина Овсянникова энэ хэргийн дараа, үйлдлийнхээ сэдлийн талаар видео бичлэг хийжээ.
“Украинд болж байгаа үйл явдал бол гэмт хэрэг. Орос бол түрэмгийлэгч. Энэ түрэмгийллийн хариуцлагыг ганц л хүн үүрнэ. Тэр хүн нь Владимир Путин. Миний аав украин хүн, харин ээж маань орос. Тэд хэзээ ч хоорондоо дайсагнаж байгаагүй. <...> Харамсалтай нь би сүүлийн хэдэн жилд “Первый канал”-д ажиллан, Кремлийн суртал ухуулгыг хийсэн. Одоо үүнээсээ ичиж байна. Телевизийн эфирээс худал ярих боломж олгож, орос хүмүүсийг зомби болгоход оролцсондоо ичиж байна. Бид энэ бүхэн эхэлсэн 2014 онд чимээгүй л байсан. Навальныйг Кремль хордуулахад бид эсэргүүцэн жагсаагүй. Бид хүний эсрэг энэ дэглэмийг үг дуугүй ажиглаад л сууж байсан. Гэтэл одоо бүх дэлхий биднээс нүүр буурууллаа. Ахан дүүсээ хядсан энэ дайны гутамшгаас манай хэдэн арван хойч үе салж чадахгүй. <...> Жагсаалд нэгд, юунаас ч битгий ай, тэд биднийг бүгдийг нь хорьж чадахгүй” хэмээн тэрбээр өгүүлжээ.
Марина Овсянникова дайн эсэргүүцсэн бичиг барьж зогссон “Время” хөтөлбөрийн бичлэг албан ёсны сайт дээрээ устсан байна.
Уншиж байна |