Гуравдугаар сарын 20-ны ням гарагт Украин дахь дайн эхэлсний 25 дахь өдөр тохиов. Энэ өдөр Оросын цэргүүд хөрш орондоо цохилт өгөхөө үргэлжлүүлж, Украины армит болон нутаг дэвсгэрийн хамгаалалтын отрядууд хариу цохилт өгсөн хэвээр байлаа. Баруун орнууд Украинд үзүүлэх цэргийн тусламжаа өргөжүүлж, харин Оросын эсрэг тавих хоригоо чангатгасаар байна. Өнгөрсөн өдрүүдэд болж өнгөрсөн тойм мэдээллийг хүргэе. 

ОХУ дуунаас хурдан зэвсэг дахин ашигласнаа зарлав 

Украинд "Кинжал" хэмээх дуунаас хэт хурдан зэвсэг дахин ашигласнаа Оросын Батлан хамгаалах яам мэдэгджээ. БХЯ-ны албан ёсны төлөөлөгч Игорь Конашенковын өгүүлснээр, Каспийн тэнгисээс далавчит пуужин хөөргөсөн байна. Хэдийгээр ийм зэвсэг хэрэглсэн ч дайнд эргэлт хийх мөч болно гэж үзэхгүй байгаагаа АНУ-ын Батлан хамгаалахын сайд Ллойд Остин мэдэгдсэн байна. Түүний өгүүлснээр ОХУ-ын Зэвсэгт хүчний урагшлах хэмнэлийг сэргээхийн тулд Владимир Путин ийм зэвсэг ашигласан гэнэ.

Дайн эхэлснээс хойш Украинд 902 энгийн иргэн амиа алджээ 

 ОХУ-ын цэргүүд хоёрдугаар сарын 24-ний өдөр Украин руу довтолж эхэлснээс хойш 902 энгийн иргэн амиа алдсан гэж НҮБ-ын Хүний эрхийн дээд комиссарын газар мэдэгджээ. Түүнчлэн 1459 хүн шархадсан талаарх мэдээлэл байгаа талаар энэ байгууллага мэдэгдсэн байна. 

ВВС агентлагийн мэдээлснээр, бодит байдал дээр дайн хохирогчдын бодит тоо илүү өндөр байж болзошгүй, учир нь гагцхүү Женевт шалгагдсан мэдээллүүдийг л зарладаг аж. Украинчуудын ихэнх нь хүнд артиллер, пуужин болон агаарын цохилтын улмаас амиа алджээ.

Урлагийн сургууль дээрээс цохилт өгчээ

Гуравдугаар сарын 19-ний өдөр Оросын цэргүүд 400 орчим иргэн хоргодож байсан урлагийн сургууль дээрээс бөмбөгдсөн эгж Украины Мариуполь хотын зөвлөл мэдээлснийг DW агентлаг дамжуулжээ. Энэ бөмбөгдөлтийн улмаас барилга эвдэрсэн, нуранган доор хүмүүс байгаа гэнэ. Одоогоор энэ бөмбөгдөлтийн улмаас гэмтэж бэртсэн хүмүүсийн тоо тодорхойгүй байгаа аж.

Үүний зэрэгцээ, гуравдугаар сарын 20-ны өдөр Орос, Украины тал энгийн иргэдийг нүүлгэн шилжүүлэх, хүмүүнлэгийн тулсамж хүргэх зорилгоор хүмүүнлэгийн долоон коридор гаргахаар тохиролцжээ. 

Германы хотуудад дайн эсэргүүцсэн жагсаал болов 

Өнгөрсөн амралтын өдрүүдэд Герман даяар олон мянган хүнийг хамарсан, дайныг эсрэгүүцсэн жагсаал болж өнгөрсөн байна. Германы DW агентлагийн мэдээлснээрБерлин хотын Бранденбургийн хаалганы орчимд "Энх тайвны дуу" нэртэй хөгжимт жагсаал болж, 15 мянган хүн энэ жагсаалд оролцсон байна.

Зохион байгуулагчид нь энэ арга хэмжээг "Европ дахь хамгийн өргөн цар хүрээтэй хөгжимт жагсаал" болсон хэмээн мэдэгджээ. Энэ төрлийн жагсаал Хамбург болон  Франкфурт-на-Майн хотуудад ч болсон байна.

Бээжин Москвад цэргийн тусламж үзүүлэхгүй

Дайн эхэлсний дараа ОХУ Хятадад хандан цэрэг, эдийн засгийн тусламж хүссэн талаарх мэдээлэл гарч, үүнийг хоёр тал няцааж байлаа. Энэ удаад Хятадын тал цэргийн тусламж үзүүлнэ гэсэн мэдээллийг дахин няцаажээ.

Тодруулбал, АНУ дахь БНХАУ-ын Элчин сайд Цинь Ган CBS телевизэд ярилцлага өгөхдөө "Хятад улс сөргөлдөөний талуудад хүнс, эм бэлдмэл, аяны хөнжил, хуурай сүү илгээж байгаа. Харин зэр зэвсэг нийлүүлээгүй" хэмээн мэдэгдсэний дээр "байдлыг намжаахын тулд Бээжин бүхнийг хийнэ" хэмээн онцолжээ.

Энд дуулгахад, Хятадын эрх баригчид Владимир Путиний үйлдлийг ил тодоор шүүмжлэх, ОХУ Украин руу дайрсныг "дайн" хэмээн нэрлэхээс өнөө хэр татгалзсаар байгаа юм.

Г.Бямбасүрэн