Монгол Улсын Ерөнхийлөгч У.Хүрэлсүх өнөөдөр төрийн дээд цол, одон, медаль гардуулж байна. “Дастан” ХХК-ийн зөвлөх, Соёл судлалын ухааны доктор, судлаач Татегийн Етекбайд Монгол Улсын Ерөнхийлөгчийн зарлигаар Соёлын гавьяат зүтгэлтэн цол хүртээлээ.

Тэрбээр, Монгол Улсын соёлын салбарт 48 жил ажиллахдаа хэвлэлийн бүтээгдэхүүний чанар, хүртээмжийг сайжруулах, чөлөөт хэвлэлийг хөгжүүлэхэд идэвх санаачилгатай ажиллаж, Төрөөс соёлын талаар баримтлах бодлогын баримт бичиг, хууль тогтоомжийн төслүүдийг боловсруулахад арга зүйгээр хангаж, улс орны хөгжил, хэвлэлийн салбарын тулгамдсан асуудлаар олон арван бүтээл туурвиж, дэлхийн 100 гаруй, үндэсний 320 гаруй үлгэрийг орчуулан хэвлүүлж, ард түмнийхээ оюуны хэрэгцээг хангахад мэдлэг чадвараа дайчлан ажиллажээ.