Монголбанкны мөнгөний бодлогын хороо өнөөдөр /2022.03.24/ хуралдаж, Мөнгөний  бодлогын хүүг 2.5 нэгжээр нэмэгдүүлж, 9 хувьд хүргэлээ. Монголбанкны ерөнхийлөгч Б.Лхагвасүрэн “Олон улсын харилцааны хурцадмал байдлаас үүдэн дэлхий дахинд тодорхой байдал нэмэгдэж, газрын тос, байгалийн хийн үнэ огцом өсөж, инфляци даамжирч, эдийн засгийн өсөлт удаашрах эрсдэлтэй тулгараад байна. Манай улсад ч энэ байдал нөлөөлж, шатахуун болон бусад импортын бүтээгдэхүүний дам нөлөөгөөр инфляци эрчимжиж, үйлдвэрлэлийн зардал нэмэгдэж, эдийн засгийн өсөлтийг сааруулж байгаа”-г онцолж байна.

Инфляцийн хүндрэл түр зуурын гэж төсөөлж байсан ч геополитикийн асуудлаас үүдэн улам удаан үргэлжлэх төлөвтэй байна. Инфляци 2022 оны 02 дугаар сард улсын хэмжээнд 14.2 хувь, Улаанбаатар хотод 15.5 хувийн өсөлттэй гарсан. Үүнд:

-Гадаад зах зээлийн нефтийн үнийн өсөлт

-Тээвэр логистикийн саатал, тээврийн нэмэлт зардал, үнэ нөлөөлжээ. ҮСХ-ны мэдээллээр нийт инфляцийн 50 орчим хувийг импортын инфляци бүрдүүлж байна.