Монгол Улсын төр, засаг хэмнэлтийн горимд шилжиж буйгаа өнгөрсөн баасан гаригт зарласан. Ерөнхий сайд Л.Оюун-Эрдэнэ Сүхбаатарын талбайд жагссан олон мянган залуусын өмнө “Засгийн газар хэмнэлтийн тусгай горимд шилжиж байна” хэмээн зарласан. Үүний дараа буюу өчигдөр УИХ-ын дарга Г.Занданшатар “2022 оны төсвийг хэмнэлтийг горимд шилжүүлэх” үүрэг даалгаврыг өглөө. Улсын төсөвт тодотгол хийх замаар хэмнэж болох бүхнийг хэмнэх үүргийг төрийн байгууллагуудад өгөв.

Төсвийн байгууллагын их засвар, тохижилт, тоног төхөөрөмж худалдан авах болон зөвлөх үйлчилгээний зардлыг тэвчих;

-Төрийн болон орон нутгийн өмчит компани, үйлдвэрийн газруудын зардлыг 30-аас доошгүй хувиар хэмнэх замаар төсөвт төвлөрүүлэх татварын болон ногдол ашгийн орлогыг нэмэгдүүлэх зэргээр төсөвт хэмнэлт хийх бүхий л арга замыг судалж, УИХ-д өргөн мэдүүлэхийг ажлын хэсэгт даалгав.

Харин өнөөдөр өглөө Авто тээврийн үндэсний төвөөс шинэ тендер зарлав. Тус газраас Тэргүүний ажилтан тэмдэг хийлгэх сонгон шалгаруулалт зарлажээ. Төсөвт өртөг нь 25 сая төгрөг. Тэгвэл энэ Г.Занданшатар дарга, Л.Оюун-Эрдэнэ сайдын яриад байгаа хэмнэлт мөн үү? Авто тээврийн үндэсний төв тэргүүний ажилтан тэмдэггүй бол ажил нь зогсох гээд байгаа хэрэг үү? Энэ тэмдэг нэн шаардлагатай, зайлшгүй хэрэгцээ мөн үү?

УИХ, Засгийн газрын тэргүүд нь Монгол Улс хэмнэлтийн горимд шилжинэ, тэвчиж болох бүхнийг тэвч, өндөр зардалтай машинаа зогсоолд байршуул хэмээн үүрэгдэж байхад төрийн байгууллага нь нэгнээ шагнах төмөр тэмдгэнд мөнгө зарлагадаж байна. Энэ бол ард түмний шаардлага, төрийн удирдлагуудын үүрэг дунд шатанд очоод цуурай болдгийн бодит жишээ.

Сонгон шалгаруулалтыг энд дарж үзнэ үү

Б.Хэрлэн