Сүүлийн үед, Молдовоос салан тусгаарласан Приднестрт байдал эгзэгтэй болох тийшээ хандаж байгаа юм. Дөрөвдүгээр сарын 22-ны өдөр ОХУ Украины өмнөд зүгийг эзлэн, Приднестр рүү орох төлөвлөгөөтэй байгаа талаараа мэдэгдэж байлаа. Үүний дараа Приднестрийн нутаг дэвсгэр дээр цуврал дэлбэрэлт болсон юм. Энэ улсын Аюулгүй байдлын яамны барилга руу гранотометоор буудсаны дээр Триасполийн нисэх буудал дээр дэлбэрэлт болж байв. 

Эдгээр хэргүүдэд бүс нутгийн дотоодын хүчин хамааралтай, тэд улс орныг дайнд татан оролцуулахаар хичээж байна гэж Молдовын ерөнхийлөгч Майя Санду мэдэгдэж байлаа. Улмаар дөрөвдүгээр сарын 26-ны өдөр Украины Зэвсэгт хүчний Ерөнхий штаб мэдэгдэл хийхдээ Приднестр дэх Оросынх цэргүүд байлдааны бүрэн бэлэн байдалд орсон гэж онцолсон бол Тагнуулын газар Оросыг Приднестрт энгийн иргэд рүү пуужингаар харвах гэж байгааг сэрэмжлүүлж байв. 

Харин Орос улс Приднестрийн бүс нутгийн нөхцөл байдлыг тогтворжуулах гэж оролдож байгаа ч Украины Зэвсэгт хүчин Молдовын эзлэгдсэн нутаг дэвсгэрээс Оросын цэргүүд довтлоход бэлэн гэж Владимир Зеленский мэдэгджээ. 

"Энэ бол ОХУ-ын ээлжит нэг алхам гэдгийг бид сайтар ойлгож байна. Тэнд Оросын тусгай албад ажиллаж байгаа. Тэд зүгээр ч нэг хуурамч мэдээлэл тараах гэж биш бүс нутаг, Молдовын нөхцөл байдлыг тогтворгүй болгохоор ажиллаж байна. Молдов Украиныг дэмжвэл таагүй зүйл болно гэдгийг харуулахаар хичээж байгаа хэрэг” хэмээн Зеленский мэдэгджээ. 

Түүний өгүүлснээр, Молдовын түр эзлэгдсэн нутаг дэвсгэр болох Приднестр дэх Оросын цэргүүд олон жилийн туршид байнгын бэлэн байдалд байгааг Украин мэдэж байгаа гэнэ. 

“Оросын цэргүүд тушаал л хүлээж байгаа. Тэдний хүчин чадлыг ойлгож байна, гэхдээ Украины Зэвсэгт хүчин энэ бүхэнд бэлэн, тэднээс айхгүй” гэж Зеленский мэдэгджээ. 

Энд дуулгахад, дөрөвдүгээр сарын 25-ны өдөр Приднестрийн нийслэлд болсон дэлбэрэлтүүдийг ОХУ-ын тусгай албад зохион байгуулсан бөгөөд тэд үүгээрээ өдөөн хатгах зорилготой гэж Украины тагнуулынхан мэдээлсэн байна. 

Приднестр нь 1990-1992 оны хооронд ЗХУ-ын задран унаx үед Бүгд Найрамдах Молдав Улсаас салан бий болсон. Приднестрийн Бүгд Найрамдах Улсад 460 мянга орчим хүн амьдардаг бөгөөд тэдний тал хувь нь Оросын иргэншилтэй байдаг аж.