Украинд өрнөж буй дайнд амиа алдсан цэргүүдийн тоогоор Буриад улс ОХУ-д хоёрдугаарт бичигдэж байна. Албан ёсны мэдээллээр, энэ улсаас цэрэгт татагдсан 102 хүн Орос, Украины дайнд амиа алдсан гэж "Люди Байкала" сэтгүүл мэдээлжээ. 

Эх сурвалжийн мэдээлснээр, гуравдугаар сараас эхлэн Улаан-Үдэд цэргийн алба хаагчидтай салах ёс хийх ажиллагааг 2021 онд баригдсан "Лукодром" спортын цогцолборт зохион байгуулж байгаа аж. Энэ спортын ордон нь Буриадад ихээхэн алдартай нум сум харвааны гол төв гэнэ. Хэдийгээр цэргүүдтэй салах ёс хийх ажиллагаа болж байгаа ч хүүхдийн спортын дугуйлангууд хичээллэсэн хэвээр байгаа аж.

"Барилгын нөгөө хэсэгт хүүхдүүд бэлтгэл хийж байна. Авс, шарил оруулж ирж байгаа танхимаас хэдхэн метрийн зайд хүүхдүүд бий" хэмээн "Люди Байкала" сэтгүүлбичжээ.

"Спорт цогцолборыг оршуулгын танхим болгосон нь эцэг эхчүүдэд таалагдахгүй байгаа. Саяхан хүүхдүүд бэлтгэл хийдэг танхимд цогцосны үнэр орж ирсэн. Аймшигтай үнэр хаа сайгүй" хэмээн эцэг эхийн төлөөлөл сэтгүүлчдэд ярьжээ.

"Люди Байкала" сэтгүүлийн мэдээлснээр, амиа алдсан цэргүүдийг Улаан-Үдэд авчирахад ихээхэн цаг хугацаа шаардагдаж байгаа, зарим тохиолдолд амиа алдсанаас нь хойш нэг, хоёр сарын дараа Улаан-Үдэд авчирж байгаа гэж сэтгүүлд бичжээ.

"Гуравдугаар сарын эхээр, Буриадад эхний шарилууд ирж байх үеэр Буриадын тэргүүн Алексей Цыденов оршуулах ёслолд хэдэнтээ оролцож байсан. Түүнийг сэтгүүлч, зураглаачид дагалдан явдаг байлаа. Некрологичид орон нутгийн гол хэвлэлүүдэд зориулан зураг авч өгдөг. Дараа нь оршуулга бараг л өдөр бүр болдог болсон, тиймээс ч Цыденов ч ирэхээ больсон" гэж "Люди Байкала" сэтгүүл бичжээ.

Улаан-Үд хотын спортын цогцолбор дахь салах ёс гүйцэтгэх танхимд олон цагдаа хамгаалалтад гардаг гэнэ. Тэд гэрэл зураг авахуулдаггүй, дүрс бичлэг хийхийг хориглодог аж.

"Буриад залуус амин зуулгаа бодон цэрэгт татагддаг"

Оросын "тусгай цэргийн ажиллагаа"-нд татагдан, Украинд амиа алдсан цэргүүдийн ихэнх нь Буриадаас гаралтай байгаа талаар хэвлэлүүд мэдээлсээр байгаа юм. Гадаадын зарим хэвлэлээр ОХУ "бага ястнууд, тэр дундаа буриадуудыг олноор нь галын шугам руу илгээж байгаа" гэх мэдээлэл олонтаа гарч байлаа. Энэ мэдээлэл үнэний ортой байх магадлалтай бөгөөд учир нь Буриадад 14 цэргийн анги нэгтгэл байдаг. Эдгээр анги нэгтгэлүүдээс хичнээн цэргийн алба хаагчийг фронт руу илгээсэн нь тодорхойгүй. 

Буриад залуус дайнд ийнхүү амиа алдаж байгааг эсэргүүцсэн Буриадаас гаралтай залуус нэгдэн "Чөлөөт Буриад" нэртэй олон улсын, дайныг эсэргүүцэх сан байгуулсан юм. Энэ сангийнхан дайныг зогсоох, Кремлийн суртал ухуулгатай тэмцэх, буриадуудыг "Орос ертөнцийн гол хамгаалагч" гэдэг байдлаас салгах зэрэг хэд хэдэн зорилго дэвшүүлжээ.

"Буриад бол маш ядуу бүс нутаг. Эндэхийн эрчүүд мөнгө олохын тулд хойд зүг рүү ажиллахаар явах, эсвэл гэрээт цэргийн алба хаах гэсэн сонголт л байдаг. Бид Украинд амиа алдсан буриадуудын талаарх мэдээллийг харахад "төрсөн газар" гэдэг дээр аль нэг суурин бичээстэй байх жишээний. Өөрөөр хэлбэл бөглүү суурингийн залуус мөнгө олох гэж л хичээсэн байна. Тэдэнд орон сууцтай болох цорын ганц боломж нь цэргийн албанд гэрээгээр ажиллах. Ингэснээр тэд цэргийн алба хаагчдад зориулсан ипотекийн зээлээр Улаан-Үдэд байр сууц авах боломжтой. Өөрөөр бол ийм байр авч хүчрэхгүй" хэмээн сангийн тэргүүн Гармажапова хэвлэлийнхэнд ярьж байв.

Гармажаповагийн өгүүлснээр, Украинд хичнээн буриад хүн амиа алдсан талаарх нарийн мэдээлэл байхгүй гэнэ.

Г.Бямбасүрэн