Орос улс Украинд байлдааны ажиллагаа явуулах үеэрээ 10-12 нэгж дуунаас хэт хурдан пуужин ашигласан гэнэ. Энэ талаар АНУ-ын Батлан хамгаалах яамны өндөр албан тушаалтан мэдэгдсэнийг CNN агентлаг мэдээлсэн байна. 

Эх сурвалжийн өгүүлснээр, хичнээн пуужин ашигласан талаарх "нарийн тоо" байхгүй, гэхдээ "10-12 нэгж пуужин харвасан" байж болзошгүй гэнэ. Түүнчлэн дуунаас хэт хурдан пуужинг хэзээ, хаанаас харвасан талаар эх сурвалж тодотгоогүй ч Украины баруун хэсэг дэх барилга руу дуунаас хэт хурдан "Кинжал" пуужин ашигласныг АНУ-ын тал мэдэж байгаа хэмээн онцолжээ. 

Харин өнгөрсөн амралтын өдрүүдэд Одесса хот руу "Кинжал" пуужин харвасан гэх Украины талын мэдэгдлийг АНУ-ын БХЯ-ны төлөөлөгч батлаагүй байна. Түүний өгүүлснээр, Одесст өгсөн цохилтыг дуунаас хэт хурдан пуужингаар гүйцэтгэсэн гэх шинж тэмдэг ажиглагдаагүй гэнэ.

Дээр дурьдсан "Кинжал" нь Оросын дуунаас хэт хурдан пуужингийн комплекс бөгөөд суурин объект болон онгоц тээвэрлэгч, крейсер зэрэг хөлөг онгоцуудыг устгах чадвартай. Энэ пуужинг 2017 оны 12 дугаар сарын нэгний өдөр туршсаны дараа Оросын Өмнөд цэргийн тойргийн аэродромууд дээр туршилт, байлдааны жижүүрт ашиглах болсон.

Г.Бямбасүрэн