Америкийн  New York Times сонин Оросын цэргүүд Киевийн ойролцоох Буча хотод энгийн иргэдийг хөнөөснийг нотлох эрэн сурвалжлах нийтлэл гаргажээ. Энэ нийтлэлд шинэ дүрс бичлэгүүд болон гэрчүүдийн мэдээлэл багтсан байна. 

Нийтлэлд өгүүлснээр, орон нутгийн батлан хамгаалах албанд алба хааж байсан ч ОХУ-ын арми нутгийг нь эзлэсний дараа зэвсэггүй байх үедээ Оросын цэргүүдийн гарт амиа алдсан найман хүний үхэлтэй холбоотой баримтыг сэтгүүлчид олж тогтоосон гэнэ.

Нью-Йорк Таймс сонинд ажиглалтын камераас авсан гэрэл зургууд нийтлэгдсэн бөгөөд эдгээр зураг дээр гуравдугаар сарын дөрөвний өдөр Оросын цэргүүд есөн хүнийг буу тулган авч явж байгаа нь дүрслэгджээ. Энэ бичлэг цааш тасарсан хэдий ч хиймэл дагуулын зураг болон ОХУ-ын арми ухарснаас хойш авсан гэрэл зургууд дээр тулгуурлан эдгээр хүмүүсийн зарим нь амиа алдсан гэдгийг сэтгүүлчид тогтоосон байна.

Нутгийн иргэдийг хөнөөсөн талаарх мэдээллийг найман гэрч өгчээ. Тэдний дунд Оросын цэргүүдэд баригдаж, буудуулсан ч амьд үлдсэн нэгэн эр багтсан байна.

Түүний ярьснаар, Оросын цэргүүд түүнийг буудсан ч амин бус газарт нь оносон, улмаар тэрбээр үхсэн мэт дүр эсгэн, цэргүүд явсны дараа зугтсан гэнэ.

Энд дуулгахад, Бучад энгийн иргэдийг хөнөөснийг гэрчлэх анхны гэрэл зургууд дөрөвдүгээр сарын эхээр буюу энэ хотоос Оросын арми ухарсны дараахан олон нийтэд ил болсон. Улмаар олон улсын зүгээс ОХУ-ыг дайны гэмт хэрэгт буруутгаж байгаа ч Оросын тал үүнийг няцааж, Киевээс зохион байгуулсан өдөөн хатгалга гэж нэрлэсээр байгаа юм. Одоо Гааг дахь олон улсын эрүүгийн шүүх Украинд гарсан гэмт хэргүүдийг шалгаж байна.

Г.Бямбасүрэн