УИХ-ын чуулганы үдээс хойших хуралдаан эхэллээ. Хуралдаанаар УИХ-ын гишүүн Н.Энхболдоос ХХААХҮ-ийн сайдад тавьсан сүүний чиглэлийн үхрийн эрчимжсэн МАА-н үйлдвэрлэлийг нэмэгдүүлэх чиглэлээр авч хэрэгжүүлж буй арга хэмжээний тухай асуулгын хариуг сонсч байна.

Асуулгыг хариуг ХХААХҮ-ийн сайд З.Мэндсайхан танилцууллаа. Монгол Улсын хэмжээнд сүү, сүүн бүтээгдэхүүний 206 үйлдвэр цех, 77 хүргэлтийн төв үйл ажиллагаа явуулж байна. Сүү боловсруулах чиглэлийн суурилагдсан хүчин чадал жилд 400 мянган тонн бөгөөд өнөөдрийн байдлаар 51 хувийг ашиглаж байна.

Одоогийн байдлаар Монгол Улсын хүн амын сүү, сүүн бүтээгдэхүүний хангамж 62.4 хувь байна. Өвөл, хаврын улиралд сүү нийлүүлэлт буурдаг учраас хуурай сүү импортолдог. 2022 онд 10 ААН 3.6 мянган тонн буюу 15.5 сая ам.долларын хуурай сүү импортолсон байна.

Сүүний чиглэлийн цэвэр үүлдэрийн үхрийн ашиг шимийг нэмэгдүүлэх, цөм сүрэг бий болгох зорилгоор Беларус улсын Засгийн газрын хөнгөлөлттэй зээлийн хөрөнгөөр сүүний цэвэр үүлдэрийн үхэр импортлох, нутагшуулах ажлыг хийхээр бэлтгэл хангаж байна.