Японы парламентын дээд танхимын гишүүн Мунэо Сузуки АНУ, Британийн үйлдлүүд Украин дахь сөргөлдөөнийг өдөөсөн хэмээн мэдэгджээ. Энэ талаар тэрбээр РИА Новости агентлагт ярьсан байна. 

"Өнгөрсөн оны 10 дугаар сарын 23-ны өдөр Украин цохилтот дрон хөөргөснөөс бүх зүйл эхэлсэн. Энэ нь бүх зүйлийн эхлэлийг тавьсан юм. Тухайн үед Путин ард түмэнд нь ч цохилт өгчих юм байна гэж ойлгоод, цэргээ хөдөлгөсөн. "Орос дайрлаа, Орос дайрлаа" гээд л Америк ч өдөөн хатгасан тал бий" хэмээн Сузуки өгүүлжээ.

Тухайн үед л Байден  "цохилтот дрон ашиглахаа зогсоохыг Украинд хатуухан хэлж", Владимир Путинийг "тэвчээртэй байхыг" уриалах ёстой байсан гэж Японы улс төрч үзэж байгаа аж.

"Дараа нь Британи өдөөн хатгасан, хатуу мэдэгдлүүд хийсэн. Үүнд л том асуудал оршиж байгаа гэж би үзэж байгаа юм" хэмээн Сузуки өгүүлжээ.

Түүнчлэн тэрбээр АНУ, Их Британийн зүгээс ирж буй өдөөн хатгалгад автахгүй байхыг Японы эрх баригчдад уриалсан байна.

Г.Бямбасүрэн