Өнгөрсөн амралтын өдрүүдэд Оросын арми Украины нийслэл Киев хот руу довтолж, дэд бүтцэд ихээхэн хохирол учирж, хорон сууц нурсны улмаас хүн амиа алдаж, олноор гэмтэж бэртсэн. Харин даваа гарагт Оросын арми худалдааны төвийг оножээ.

ВВС агентлагийн мэдээлснээр, даваа гарагт Полтав мужийн Кременчуг хотын "Амстор" сүлжээний худалдааны төвийг Оросын пуужин оножээ. Энэ цохилтын улмаас 16 хүн амиа алдаж, олон хүн гэмтэж бэртсэн талаар Украины Онцгой байдлын улсын алба мэдээлсэн байна. Ерөнхийлөгч Зеленскийн мэдэгдсэнээр, пуужин унах үеэр худалдааны төв дотор мянга орчим хүн байжээ. 

Пуужингийн цохилтын дараа олон хүн амиа алдаж, бэртэж гэмтсэнээс гадна хүн сураггүй болсон талаарх 40 өргөдлийг Украины Ерөнхий прокурорын газар хүлээн авсан байна. Прокурорын газрын мэдэгдсэнээр 59 хүн гэмтэж, шархдан, түлэгдсэнээс тал нь биеийн байдал хүнд байгаа гэнэ.

Пуужингийн цохилтын улмаас худалдааны төв шатаж, 10 мянган кв.метр талбай галд өртөн, гал унтраах 20 машин, 115 гал сөнөөгч, гал унтраах галт тэрэг ирж ажиллажээ.

Украины Зэвсэгт хүчний агаарын цэргийн хүчний командлалын мэдээлснээр, Оросын Ту-22 М3 бөмбөгдөгч онгоцууд унагасан Х-22 хоёр пуужин Кременчуг хот дээр унажээ. Эдгээр онгоцнууд Оросын Калуг мужийн Шайковка агаарын буудлаас хөөрч, улмаар Курск мужийн дээгүүр нисэж өнгөрөх үедээ пуужингаа хөөргөсөн байна. Энэ хоёр пуужингийн нэг нь худалдааны төвийг оносон бол нөгөө нь цэнгэлдэх хүрээлэн дээр унажээ. 

Пуужингийн цохилтод өртсөн "Армстор" сүлжээний худалдааны төв нь хотын төвд байрлалтай, Кременчугийн төмөр замын буудлаас 300 метр зайд байрладаг аж. Тухайн үед агаарын түгшүүрийн дохио дугарч, үүнээс 10 минутын дараа хүмүүс худалдааны төвийг яаравчлан орхисон ч худалдан авагч, төвийн ажилтнууд гээд олон хүн барилгаас гарч чадалгүй гацсан гэнэ. 

"Асар том алан хядлага"

Энэ үйл явдлын дараа Украины Ерөнхийлөгч Владимир Зеленский ард түмэндээ хандан ээлжит мэдэгдэл хийхдээ Оросыг "алан хядагч улс" хэмээн дахин нэрлэжээ.

"Кременчугийн худалдааны төвд Орос өнөөдөр цохилт өгсөн нь Европын түүхэн дэх хамгийн аймшигт алан хядах халдлагуудын нэг. <...> Оросын төр дэлхийн хамгийн том алан хядагч байгууллага болсон. Энэ бол бодит үнэн. Үүнийг хуулийн баримт болгох ёстой. Оросын газрын тосыг худалдан авах эсвэл дамжуулан тээвэрлэх, Оросын банкуудтай холбоотой ажиллаж, Оросын төрд татвар хураамж төлж байгаа орон бүр энэ үйлдлээрээ алан хядагчдад мөнгө өгч байна гэж ойлгох хэрэгтэй" хэмээн Зеленский мэдэгджээ. 

Кременчугт болсон үйл явдлын дараа АНУ-ын Төрийн нарийн бичгийн дарга Энтони Блинкен "Оросын пуужингийн цохилтын улмаас дэлхий айдаст автлаа" хэмээгээд АНУ Украиныг дэмжсэн хэвээр байна хэмээн цохон тэмдэглэсэн байна.

Харин Британийн Ерөнхий сайд Борис Жонсон энэ цохилтыг "Оросын Ерөнхийлөгч Владимир Путиний хэрцгий, балмад зан"-ийн илэрхийлэл хэмээн мэдэгджээ.

Түүнчлэн, энэ өдрүүдэд G7-ийн дээд хэмжээний уулзалтад цуглараад буй дэлхийн улс төрчид ч энэ үйлдлийг эрс буруушааж, "энгийн иргэдийн дээрээс пуужингаар цохилт өгөх нь цэргийн гэмт хэрэг. Владимир Путин болон буруутай этгээдүүд хариуцлагад татагдана" хэмээн мэдэгджээ.

Г.Бямбасүрэн