Монгол Улсын Ерөнхийлөгч У.Хүрэлсүхийн зарлигаар Соёлын гавьяат зүтгэлтэн Гончигжавын Чулуунбатыг Сүхбаатарын одонгоор шагналаа. 

Тэрбээр,  хэвлэл мэдээллийн салбарт 50 гаруй жил хөдөлмөрлөж, олон мянган нэвтрүүлэг, реклам сурталчилгаа, баримтат киноны тайлбарыг ард түмэндээ хүргэж, Төрийн ёслол, хүндэтгэлийн арга хэмжээнүүдийг мэргэжлийн түвшинд хөтлөн явуулж, салбарын олон арван алдартныг бэлтгэн төрүүлсэн, телевиз, радиогийн нэвтрүүлгийн чанарыг сайжруулахад хүндтэй хувь нэмэр оруулсан юм.

Соёлын гавьяат зүтгэлтэн Гончигжавын Чулуунбат "Та бүхэндээ  Үндэсний их баяр наадмын халуун мэндчилгээ дэвшүүлье.

 

...Би одоогоос 40 жилийн өмнө Ардын хувьсгалын 60 жилийн ойн баяр наадмаар Соёлын гавьяат зүтгэлтэн гэдэг эрхэм хүндтэй цолыг хүртсэн. Ингээд 40 жилийн дараа Ардын хувьсгалын 100,101 жилийн ойн баяраар Сүхбаатарын одон хүртэж байгаадаа баяртай байна. Монгол төрийн баяр наадмыг 50 жил нээж, 50 жил хааж, 50 жил наадлаа" гэж баярын сэтгэгдлээ хуваалцлаа. 

М.Насан