Украинд дайн дэгдсэнээс хойш энэ улсын боомтууд хаагдаж,  экспортын үр тариаг дэлхийн зах зээлд гаргах боломжгүй болсон юм. Улмаар дэлхийн үр тарианы зах зээлийн арав гаруй хувийг хангадаг Украинд нөхцөл байдал ийн эргэсэн нь дэлхий дахинаа хүнсний хямрал нүүрлэхэд нөлөөлнө гэж олон улс сэрэмжлүүлж, Украинаас үр тариа зөөн гаргах асуудлыг шийдвэрлэхээр олон сарын хугацаанд хэлэлцсэн. Ингээд хэлцлийн  үр дүн гарч, Одессын боомтоос үр тариа ачсан эхний хөлөг онгоц наймдугаар сарын нэгний өдөр хөдөлсөн юм. 

Энэ хөлөг онгоц Сьерра-Леоны далбаатайгаар Одессын боомтоос хөдөлж, маргааш нь Туркт хүрсэн талаар Украины Ерөнхийлөгч Владимир Зеленский мэдэгдэж, цаашлаад Украины боомтууд дээр хадгалагдаж буй ачааг тасралтгүй тээвэрлэхийн чухлыг онцолж байв. 

Харин өнөөдөр, наймдугаар сарын тавны өдөр Одессын боомтоос эрдэнэшиш ачсан Navistar болон Rojen хөлөг онгоцууд хөдөлсөн талаар "Аль-Жазира" телевиз мэдээлжээ. Эх сурвалжийн мэдээлснээр, Navistar 33 мянган тонн үр тариаг Ирланд руу,  Rojen хөлөг онгоц 13 мянган тонн үр тариаг Их Британи руу хүргэх юм байна. Түүнчлэн өөр нэг хөлөг онгоц өнөөдөр Черноморскийн боомтоос хөдлөх аж. 

Өмнө нь Украины Тэнгисийн боомтын захиргаа мэдэгдэл хийхдээ, Украины боомтуудад 68 хөлөг онгоц, 1,2 сая тонн ачаатайгаар ээлжээ хүлээж байгаа хэмээж байв. Украины боомтуудад хадгалагдаж буй 1,2 сая тонн ачааны гуравны хоёр нь дэлхий даяар хүлээж буй хүнс гэнэ.Одессын боомтууд дээр дахин 16 хөлөг ээлжээ хүлээж байгаа бөгөөд эдгээр нь Оросын түрэмгийлэл эхэлснээс хойш гацсан хөлөг онгоцууд юм байна. 

Г.Бямбасүрэн