Олон улсын хүний эрхийг хамгаалах Эмнести Интернэшнл наймдугаар сарын дөрөвний өдөр нэгэн тайлан гаргасан нь дэлхий нийтэд ихээхэн шуугиан тарьж, шүүмжлэлд өртөж байлаа. Энэ тайланд Украины цэргүүд дайны хууль зөрчиж, цэргийн техник, зэвсэгийг сургууль, эмнэлэг, орон сууцны хорооллын дунд байршуулж байгааг онцолсон юм.

Украины цэргийн энэхүү тактик нь олон улсын хүний эрхийг зөрчиж байгаа бөгөөд иргэний байгууламжуудыг байлдааны бай болгож байна хэмээн Эмнести интернэшнл байгууллага буруутгаж, улмаар, Оросын цэргүүд хотуудад цохилт өгсний улмаас энгийн иргэд амиа алдаж, иргэний дэд бүтэц сүйрч байгааг онцолж байв. 

Ийм тайлан гарсны дараа олон улсын зүгээс хүчтэй эсэргүүцэлтэй тулгарсан юм. Барууны болон Украины улс төрчид тайланд эгдүүцэн, дургүйлхэж, харин Орост энэ тайланг ихээхэн нааштай үнэлж байлаа. Чухамхүү энэ тайлангаас болж Эмнести интернешнл байгууллагын Киев дэх салбарын тэргүүн Оксана Покальчук огцорсон юм. 

Ийнхүү шуугиан дэгдсэний дараа Эмнести Интернегно байгууллага Украины армийг энгийн иргэдийг аюулд оруулж байгаад буруутгасан илтгэл нь "уур бухимдал, эмзэглэл" төрүүлсэнд уучлалт гуйсан байна. 

"Өнөөгийн болон бусад сөргөлдөөнд иргэдийг хамгаалах нь Эмнести Интернешнлийн тэргүүлэх зорилт. Бидний сүүлд нийтэлсэн мөрдөн шалгалтын үр дүнг олонд танилцуулах үеийн цорын ганц зорилго нь мөн л иргэдийг хамгаалах явдал байлаа. Бид урьдын адил, дүгнэлтээ бүрэн хадгална, гэхдээ бусдыг эмзэглүүлсэндээ харамсаж байна" хэмээн Эмнести интернешнл мэдэгджээ.

Шуугиан тарьсан энэхүү илтгэлд, Украины цэргүүд сургууль, эмнэлэг, суурин газарт цэргийн техникүүдээ байршуулж байгаа, тэд хамгаалах байршилд байгаа гэдэг нь Украины цэргийн алба хаагчид олон улсын хүмүүнлэгийн эрхзүйг мөрдөхгүй байж болно гэсэн үг биш. Украины засгийн газар цэргүүдээ суурин газраас нэн даруй татаж эсвэл цэргүүд байгаа газраас иргэдийг нүүлгэн шилжүүлэх ёстойг онцолсон байв.

Г.Бямбасүрэн