Япон-Монголын дипломат харилцаа тогтоосны 50 жилийн ой тохиож буйтай холбогдуулан хоёр улсын цаашдын харилцааг гүнзгийрүүлэх зорилгоор Монгол залуучуудын дунд Япон улсын талаарх өнөөгийн ойлголт, цаашдын хандлагыг тодруулах асуулга явуулжээ.

Уг судалгааг монгол залуучуудын Япон улсыг сонирхож буй байдал, гадаад улс руу аялах хандлагыг тодорхойлох зорилготойгоор явуулсан бөгөөд судалгаа явуулсан зорилтот бүлэг нь Монголын их, дээд сургуулийн оюутнууд байв. Судалгааг зургаадугаар сарын 22-ноос наймдугаар сарын 9-ний өдрүүдэд сар гаруйн хугацаанд Google forms-оор 15 хаалттай болон нээлттэй асуулгын хүрээнд явуулсан байна.

Судалгаанд их, дээд сургуулийн 17-30 насны бакалавр болон магистрын хөтөлбөрийн нийт 310 оюутан оролцсон байна. Судалгаанд оролцогчдын 55 хувь нь эмэгтэй, 45 хувь нь эрэгтэй байв. 

Залуучууд Япон улсад сэтгэл татагддагийн шалтгаан нь Япон улсын ил харагдах соёлын бүтээгдэхүүн /анимэ, манга гэх мэт/ гадна, нийгмийн доторх соёл, ёс суртахуун нь тухайн улсад татагдах голлох хүчин зүйл болж байна гэсэн үр дүн гарсан байна.

Гэвч санхүүгийн болон хэлний мэдлэг зэрэг асуудлууд тулгарч байна. Тухайлбал, судалгаанд оролцогчдын дийлэнх нь гадаад руу аялахад зардал багатай эсэх, онгоцны тийз, замын зардал хямд эсэх, хэл нэвтрэлцэх эсэхийг чухалчилж байна. 

Монгол залуучуудын нэг удаагийн аяллын зардалд төсөвлөж буй дүн нь 2022 оны нэгдүгээр улирлын байдлаарх монгол хүний дундаж цалин 3-5 дахин нэмэгдүүлсэнтэй тэнцэх хэмжээний мөнгөн дүнтэй тэнцэж байгаагаас харахад Япон руу явмаар байвч санхүүгийн хувьд бололцоогүй байгаа юм. 

Мөн гадаад руу аяллаар явахад ашигладаг мэдээллийн эх сурвалжийг тодруулсан бөгөөд аяллын сайт , Фейсбүүк, гэр бүл, найз нөхөд, танилуудаасаа мэдээлэл авдаг гэх хариулт зонхилж байна. 

Тиймээс тус оюутнуудын зүгээс эдгээр асуудлыг бууруулах зорилгоор гурван санаа дэвшүүлжээ.

Үүнд:

1. Хэл
2. Санхүүгийн  дэмжлэг
3.  Японы орны талаар сурталчлах

Сүүлийн жилүүдэд япон хэл сонирхон судлах хүмүүсийн тоо нэмэгдэж буйтай холбоотойгоор хэл сонирхож судалж байгаа оюутан залууст зориулан чадвараа сайжруулах боломж бүхий уулзалт, семинар зохион байгуулах нь зүйтэй гэж үзэж байна.

Мөн улс хоорондын зорчих зардлын үнийг бууруулах тухай санал солилцож, бодитой үр дүнд хүрэх нь цаашдын хоёр орны харилцаанд эерэг нөлөөлөл авчрах боломжтой хэмээн дүгнэж байна. Түүнчлэн монгол залуучуудын Японы уламжлалт соёлыг төдийлөн сайн мэдэхгүй байгаа нь судалгааны үр дүнгээс харагдаж байгаа тул Кабүки, цайны ёслол зэрэг соёлын арга хэмжээг сурталчлах нь Япон улсыг илүү танин мэдэх боломжтой хэмээн харж байна. Ингэснээр хоёр орны харилцаанд эерэг нөлөө авчрах боломжтой” гэв.