ОХУ хоёрдугаар сарын 24-нд Украинд дайн өдүүлснээсээ хойш гуравдугаар сард л ганц удаа цэргийн хохирлынхоо талаар ам нээж, түүнээс хойш энэ мэдээлэл улсын нууцад хамаарна гэсэн үндэслэлээр огт мэдэгдэл хийгээгүй юм.

Энэ зуур Украин болон барууныхан Оросын цэргийн бие бүрэлдэхүүний хохирлын талаар харилцан адилгүй мэдээлэл өгсөөр байна. АНУ Оросыг 80 мянган хүнээ алдсан гэж үзэж байгаа. Аль аль талын мэдээллийг нягтлах, батлах боломжгүй энэ нөхцөлд ВВС агентлаг нээлттэй эх сурвалжууд дээр үндэслэн, хохирлын зарим хэсгийг баримтаар баталгаажуулжээ.

ВВС агентлагийн мэдээлснээр, сэтгүүлчид нээлттэй эх сурвалжуудаас авсан мэдээлэл дээр үндэслэн, Украинд амиа алдсан Оросын 6020 цэргийн нэрийг тогтоож чаджээ. Амиа алдсан хүмүүсийн дунд тусгайгийн отрядууд, түүнчлэн бага тушаалын офицерүүд олон байгааг ВВС онцолсон байна. 

Эх сурвалжийн онцолсноор, Оросын албан тушаалтнууд Украинд амиа алдсан цэргүүдийн талаар мэдээлэх нь улам багассан, тиймээс сургуулийн ханан дээрх самбар, оршуулгын газрын хөшөө, цэцэрлэгт хүрээлэн, цэргийн ангиуд дахь дурсгалын хөшөө л мэдээлэл өгөх гол эх үүсвэр болсон гэнэ. Ийм самбар, хөшөөг ВВС агентлагийн сэтгүүлчид олж, тэмдэглэн, зарим цэргийн үхлийн талаар эрх баригчид ч тэр, сэтгүүлчид ч тэр, ар гэрийнхэн нь ч олон нийтийн сүлжээнд мэдээлээгүйг олж тогтоожээ.

ВВС агентлагийн бичсэнээр, булшин дээрх бичиглэл болон оршуулсан өдрөөс харахад Украинд амиа алдсан цэргүүдийг Орос руу хүргэх, улмаар оршуулахад 14-20 хоног шаардагддаг аж. Гэхдээ гурав, дөрвөн сарын өмнө амиа алдсан цэргүүдийг долоо болон наймдугаар сард л оршуулсан тохиолдол багагүй гарчээ.

Украинд хамгийн их цэрэг нь алдсан бүс нутгуудыг жагсаахад Дагестан урьдын адил тэргүүлж байгаа аж. Эндээс цэрэгт явсан 278 хүн дайны талбарт амиа алджээ. Үүний араас Буриад улс багтаж байна.

Гагцхүү нээлттэй эх сурвалжуудаар батлагдсан мэдээллээс харахад л Буриадын 256 цэрэг дайнаас эргэн ирээгүй аж. Гуравдугаарт 227 цэргээ алдсан Краснодар хязгаар багтжээ. Гэтэл ОХУ-ын нийт хүн амын есөн хувийг эзэлдэг Москва хотоос цэрэгт татагдсан нь цөөн гэдгийг амиа алдагсдын тоо гэрчилнэ. Эндээс цэрэгт яваад амиа алдсан 15 хүн л байгаа гэсэн мэдээлэл батлагдсан байна.

Оросын армийн бүрэлдэхүүнд хуучин Зөвлөлтийн орнуудаас гаралтай хүмүүс ч багтах бөгөөд тэд ч Украинд олноор амиа алджээ. ВВС агентлагийн мэдээлснээр, Кыргызстанаас 13, Тажикистанаас ес, Гүрж, Өмнөд Осетоос 12, Молдавын нэг иргэн байлдаж яваад амиа алдсан байна.

ВВС агентлагийн сэтгүүлчдийн гаргасан жагсаалтад амиа алдсан 6024 цэргийн нэр байгаагийн 1025 нь буюу 17 хувь нь офицер, үүнээс 4 нь генерал, 35 нь хурандаа байгаа аж. 

Түүнчлэн Оросын армийн бага тушаалын офицерүүд ихээхэн хохирол амссан байна. Учир нь гагцхүү бага тушаалын офицерүүд л байлдаан явуулах үндсэн тактикийн шийдвэр гаргадаг юм. Мөн ихэвчлэн 21-22 насанд дэслэгч цол авдаг тул амиа алдсан бага тушаалын офицерүүдийн ихэнх нь залуус байжээ. 

Ачаа 200-г зөөх ачаалал хэтэрсэн 

Украины талаас Оросын хохирлыг асар их, тиймдээ ч "Ачаа 200-г зөөх ачаалал нь хэтэрсэн" гэсэн мэдээллийг байнга түгээж байгаа юм. Хамгийн сүүлд гэхэд Украины 24 суваг тусгай албадаас авсан эх сурвалжтайгаар мэдээлэхдээ дайны талбарт амиа алдсан цэргүүдийнхээ цогцосыг зөөхийн тулд Оросын эрх баригчид хувийн агаарын тээврийн компаниудыг шахалтад оруулж байгаа хэмээн онцолж байв. . 

ОХУ Украинд асар их хохирол амссан тул хувийн компаниудыг “Ачаа-200”-г зөөхийн тулд албадаж байгаагийн дээр ямар ч төлбөр төлөөс өгөхгүй байгаа гэж эх сурвалж мэдээлжээ. Ачаа 200 гэдэг нь цэргийн алба хаагчийн цогцосыг оршуулах газарт хүргэх тээвэрлэлтийн үеийн код нэршил юм. 

24 сувгийн мэдээлснээр, Оросын зах хязгаар нутгууд руу цогцос зөөх ажил эрс нэмэгдсэн тул агаарын тээврийнхний ачаалал эрс өссөн гэж Украины тусгай албад мэдээлжээ. Мөн хувийн агаарын тээврийн компаниудыг албадан цэргийн зориулалтаар ашиглах болсон нь төсөв болон тээврийн ачааллыг ихээхэн бууруулсан гэнэ. 

Хувийн компаниудыг албадах болсон нь “Ачаа 200” тээвэрлэх онгоцууд ямар ч зогсолтгүй шахам нислэг үйлдэж байгаагийн улмаас олноо эвдрэх болсон байна. Гэвч сэлбэг хэрэгсэл хангалтгүй тул нислэгийн паркад засвар үйлчилгээ хийх боломжгүй байгаа аж.

Тиймээс хувийн компаниудыг дайчлах болсон бөгөөд харин төрөөс тэдэнд ямар нэгэн нөхөн төлбөр төлөхгүй байгаа, цаашдаа Оросын агаарын тээвэрлэгчид эхнээсээ дампуурлаа зарлаж магадгүй гэж Украины хэвлэл мэдээлж байлаа
 

Г.Бямбасүрэн