Владимир Путиний итгэмжит этгээд гэгддэг, Оросын олигархи Евгений Пригожин хорих ангид очин, хувийн цэргийн компани нь болох “Группа Вагнера”-д хоригдлуудыг элсүүлж, улмаар Орос, Украины дайны фронт руу илгээхээр ухуулж байгаа талаарх дүрс бичлэгийг Навальныйн дэмжигчид цацаж байв.
ВИДЕО: Путиний итгэмжит этгээд хоригдлуудыг цэрэгт татахаар хорих газруудад биечлэн очиж байна
Энэ мэдээлэл гарсны дараа Оросын иргэдийн дунд ихээхэн шуугиан дэгдэж, олон хүн хоригдлуудыг цэрэгт татахаар ятгаж байгааг шүүмжилжээ. Харин үүний хариуд Пригожин “Конкорд” компанийнхаа цахим хуудсаар дамжуулан тайлбар өгсөн байна.
"Хувийн цэргийн компани, хоригдлууд байлдахыг хүсэхгүй байгаа, энэ сэдвийг шүүмжилж байгаа, үүнийг хийхийг хүсэхгүй байгаа, ер нь энэ сэдэв таалагдахгүй байгаа хүмүүс хүүхдүүдээ фронт руу явуул л даа. Эсвэл хувийн цэргийн компани болон хоригдлууд эсвэл танай хүүхдүүд, өөрсдөө л шийд” хэмээн Пригожин өгүүлжээ.
Түүнчлэн өөрөө хоригдол байсан бол Вагнерад нэгдэхийг мөрөөдөх байсан хэмээсэн байна.
“Би хоригдол байсан бол Эх орныхоо өмнө өрөө төлөх боломжтой болохын тулд энэхүү нөхөрсөг хамт олны эгнээнд нэгдэхийг мөрөөдөх байлаа” хэмээн Пригожин өгүүлсэн байна.
Хоригдлуудтай хийсэн уулзалт
Өнгөрсөн лхагва гарагт "Популярная политика" суваг ажиллуулдаг, Алексей Навальныйг дэмжигчид ихээхэн шуугиан тарьсан дүрс бичлэг цацсан юм. Энэ бичлэг дээр Оросын олигархи, "Вагнер" хувийн цэргийн компанийг эзэмшигч, Путиний итгэмжит этгээд гэгддэг Евгений Пригожин Украины дайнд оролцуулахаар хоригдлуудыг ухуулж байгаа нь дүрслэгдэнэ.
"Би хувийн цэргийн компанийн төлөөлөгч. Та нар Вагнера гэж сонссон л байх. Хүндхэн дайн болж байна. <...> Бид 22-оос дээш насныхныг элсүүлнэ. Ийм насанд хүрээгүй бол ойрын төрөл төрөгсдөөсөө зөвшөөрлийн бичиг авна. Цэрэгт элсэх хүмүүсийн насны босго нь 50. Гэхдээ чадал хүрэхээр бол хамаагүй, яг одоо энд хялбархан тест аваад, шалгачхаж болно" бичлэг дээр дүрслэгдэх эр ярьж байв.
Хоригдлуудыг цэрэгт татагдан, фронт руу явж байлдаад зургаан сар өнгөрмөгц өршөөнө гэж амалсан байна. Харин амиа алдсан тохиолдолд цэргүүдийн гэрээслэлд заасан газар руу цогцосыг хүргэнэ, бүгдийг Баатруудын дурсгалын цогцолборт оршуулна хэмээн ярьжээ.
Харин фронтод очсон хойноо эргэлзэж, “бултах” гэвэл "цэргийн албанаас оргон зайлсан" гэж үзээд буудна хэмээсэн байна.
Энэ уулзалтын дараа 200 орчим хоригдол “Группа Вагнера” компанид хөлсний цэргээр элссэн гэх мэдээллийг Медуза, Фонтанка зэрэг Оросын хараат бус хэвлэлүүд мэдээлжээ.
“Группа Вагнера” хувийн цэргийн компани нь Оросын албан бус цэргийн нэгтгэл бөгөөд цэргийн байгууллагуудын бүртгэлд байдаггүй. Гэхдээ энэ компанийн цэргүүд Сири дэх ОХУ-ын тусгай ажиллагаа, Африк, Украины дайнд оролцдог гэсэн эрэн сурвалжлах нийтлэлүүд удаа дараа гарч байлаа.
Г.Бямбасүрэн