"Россотрудничество"-ийн Монгол дахь төлөөлөгчийн газар, "Монголын хүүхдүүд" ТББ, "Монгол Улсад байнга оршин суудаг Оросын иргэдийн нийгэмлэг" ТББ-ууд хамтран ажиллах санамж бичиг байгуулжээ.

Тус санамж бичгийн хүрээнд Крымд байрладаг "Артек" олон улсын хүүхдийн төвд монгол хүүхдүүдийг амраах гэнэ. Мөн Монголд байнга оршин суудаг оросуудын хүүхдүүдийг ч мартсангүй.

Ингэхдээ “Мы поедем в Артек -2022” уралдааныг зохион байгуулж, ялагч болсон 20 хүүхдийг 2022 оны 12 дугаар сарын сүүлээр Крымд аваачихаар тохиролцжээ.

Украин, Оросын хооронд юу болж байгааг дэлхий нийт мэднэ. Тэнд амар амгалан амьдрал өрнөх бус дайн болж байгаа. Украины Ерөнхийлөгч Зеленский "Украин болон чөлөөт Европын эсрэг Оросын энэ дайн Крымээс эхэлсэн, Крымээр дуусах ёстой. Крымийг чөлөөлснөөр энэ дайн дуусна" хэмээн мэдэгдээд буй. Өөрөөр хэлбэл украинчууд Крымийг буцааж авахын тулд хэзээ ч довтолж болзошгүй гэсэн үг. Оросуудын санаачилгаар монгол хүүхдүүд Хар тэнгисийн эрэгт амарч явахад аюул нүүрлэхийг үгүйсгэх аргагүй.

Дэлхий нийт Орос улсаас нүүр буруулсан. Монгол Улс хэдийгээр түдгэлзсэн байр суурь илэрхийлж байгаа ч дайныг хэзээ ч дэмжихгүй. Тиймээс монгол хүүхдээр улс төр хийх, цаашлаад дайны бамбай болгохыг хүлээн зөвшөөрөхгүй нь тодорхой.

Энх тайвныг эрхэмлэгч Монгол Улсын иргэд дайны голомт руу үр хүүхдээ илгээнэ гэж үү!

Украинд 2014 онд улс төрийн хямрал нүүрлэж, зарим муж, нутаг Оросын нөлөөн дор салан тусгаарлах ажиллагаа эхлүүлсэн. Эдгээрийн нэг нь Крымийн хойг бөгөөд 2014 оны гуравдугаар сард энэ хойгт олон нийтийн санал асуулга явагдаж, Оросын бүрэлдэхүүнд орохоор болсон юм. Үүнийг дэлхий дахин "Оросын эзлэн түрэмгийлэл", "Украины нутаг дэвсгэрийн бүрэн бүтэн байдалд халдсан" гэж үзэн ОХУ-ын эсрэг хориг арга хэмжээнүүд тавьж байв.

Б.Хэрлэн