ОХУ Украин дахь сөргөлдөөнийг аль болох хурдан дуусгах эрмэлзэлтэй байгаа гэж Туркийн Ерөнхийлөгч Режеп Тайип Эрдоган үзэж байгаа аж. Тэрбээр Узбекистанд ОХУ-ын Ерөнхийлөгч Владимир Путинтэй уулзсаныхаа дараа ийм дүгнэлтэд хүрсэн гэнэ. 

"Би Узбекистанд Путинтэй уулзсан. Тэд үүнийг аль болох хурдан дуусгахыг оролдож байна гэдгийг би ойлгосон. Энэ нөхцөл байдал том асуудал" хэмээн Эрдоган PBS сувагт ярилцлага өгөх үеэрээ мэдэгджээ.

Түүний өгүүлснээр, Украин, ОХУ "200 олзны хүнийг солилцох хэлэлцээ" байгуулсан гэнэ.

"Энэ бол маш том ололт. Нөгөө талаас, манай нөхөд болон техникийн мэргэжилтнүүд хөдөө аж ахуйн бүтээгдэхүүнүүдийг  зөөх асуудлыг хариуцаж байна. Энэ бол таатай үйл явц. Гэхдээ Украин ч мөн Оростой адил ойлголттой байж, өнөөгийн энэ сөргөлдөөн, дайныг зогсоохын тулд хоёр тал хоёулаа санаачилга гаргах ёстой" хэмээн Эрдоган мэдэгджээ.

Энд дуулгахад, дайн эхэлснээс хойш дөрөв дэх өдөр нь буюу хоёрдугаар сарын 28-ны өдөр Украин, Орос анхны хэлэлцээгээ, гуравдугаар сарын 29-нд Стамбулд сүүлийн хэлэлцээ хийж, ямар ч үр дүнд хүрэлгүй зогсонги байдалд орсон юм. Владимир Путин өнгөрсөн долоо хоногт мэдэгдэлд хийхдээ сөргөлдөөнийг нэн даруй дуусгавар болгохын тулд Москва бүхнийг хийхэд бэлэн байгаа ч Украин хэлэлцээ хийхээс татгалзаж байна хэмээн онцолж байлаа. Харин Украины Ерөнхийлөгчийн захиргааны тэргүүний зөвлөх Михаил Подоляк "хэлэлцээ хийх эсвэл төрийн тэргүүнүүд уулзах нь ямар ч утга учиргүй" хэмээн мэдэгдэж байв.

Г.Бямбасүрэн