Ebarimt сугалааны тохирол өнгөрсөн долоо  хоногийн лхагва гарагт явагдсан. Харин НӨАТ-ын улирлын буцаан олголтыг энэ сард багтаан иргэдийн дансанд шилжүүлэхээр болсныг татварын байгууллагаас мэдээллээ.

НӨАТ-ын сугалааг энэ оны 10 дугаар сарын 1-нээс шинэчилсэн байдлаар явуулахаар болсон талаар Сангийн сайд Б.Жавхлан мэдэгдэж байв. Тэрбээр "Өнгөрсөн 5 дугаар сард сугалааг зогсоосноос хойш НӨАТ-ын баримтын баталгаажуулалтын тоо хоёр дахин буурсан”-ыг мэдээлсэн юм.

Энэ нь цаашлаад НӨАТ-ын орлогод сөргөөр нөлөөлөх байдал л үүснэ. Тиймээс сугалааны системд шинэчлэл хийж, НӨАТ-ын баримтаа баталгаажуулж уншуулсан иргэн бүр өөрийн сугалааны сериал дугаарыг утаснаасаа харах боломжтой болсон”-ыг мэдээлсэн юм.

Ebarimt -ын сугалааны тохирлын дөрвөн шинэчлэл

1. Та хаана ч явсан НӨАТ-ын сугалааны азтан тодруулах нэвтрүүлгийг үздэг болно. Та ebarimt аппликейшнаар сугалааны тохирлоо үзэхээс гадна таны баталгаажуулсан баримт хэрхэн оролцож байгааг хянах боломж бүрдсэн. Мөн азтан болж байгаа төлбөрийн баримтын байршил зэрэг мэдээллүүдийг тухайн цаг үед нь авч чадна.

2. Та 51+ баримт бүртгүүлвэл азтан болох магадлал өсч, урамшууллын дүн ч нэмэгдэнэ. Жишээ нь та 3 баримт бүртгүүлсэн байгаад 3 орон таарвал 30,000 төгрөгний урамшуулал авах бол 51+ баримт бүртгүүлсэн бол 60,000 төгрөгний урамшуулал авна. Энэ нь олон баримт бүртгүүлдэг хүмүүсийг урамшуулах бодлого. Нөгөө талаас баримтын баталгаажуулалтыг дэмжсэн бодлого юм.

3. Азтан танд нэмэлт урамшуулал өгнө. Таны худалдан авалт хийсэн орон нутагт НӨАТ-ын хуулийн хэрэгжилтийг өмнөх онтой харьцуулж, баримт хэвлэлт нэмэгдсэн хувиар сугалааны хонжвор дээр нэмж урамшуулал бодогдоно . Жишээ нь та Дархан-Уул аймгийн иргэн аль эсвэл худалдан авалт хийсэн, 9 баримт бүртгүүлснээс 3 орон таарч 30,000 төгрөгний азтан болсон гэж бодоод нэмэлтийг тооцольё. Өмнөх онтой харьцуулсан харьцуулалтыг Татварын ерөнхий газраас судалж өгөх юм. Дархан –Уул аймаг 23% -иар баримт хэвлэлт өссөн гэж бодоход 30,000*(1+23) =36,957 төгрөг болж нэмэгдэн азтны дансанд орох юм.

4. Хонжвор бүр эзэнтэй. Өмнө нь НАЙМАН орон таарахгүй тохиолдолд супер хонжворыг дараагийн тохирол руу шилжүүлдэг байсан бол одоо найман орон таартал нь бөмбөлөгөө үлээлгэх юм. Ингэснээр хонжвор бүр эзэнтэй болно.