Нийслэлийн хүн амын өсөлт,  барилга байгууламжийн тоо нэмэгдэхийн хэрээр эрчим хүчний хэрэглээ өсөн нэмэгдэж байгаа. Төвийн бүсийн  эрчим хүчний хэрэглээний 70 гаруй хувийг, Улаанбаатар хотын дулааны эрчим хүчний хэрэглээний 60 гаруй хувийг хангадаг ДӨРӨВДҮГЭЭР цахилгаан станц ТЭГ ЗОГСОЛТ хийхэд хүрээд байна. Гэтэл салбарын сайд нь “аргална” хэмээн хэнэггүйтэж суух.  

Тус станцын хувьд Хөгжлийн банкнаас их хэмжээний зээл аваад буцааж төлөөгүй муу түүхтэй. Бүр тодруулбал, Хөгжлийн Банкны санхүүжилтээр Дулааны IV цахилгаан станцад өргөтгөл хийж, 89 мегаваттын эх үүсвэрийн хүчин чадлыг бий болгосон. Дулааны IV цахилгаан станц ТӨХК нь 1986 онд ашиглалтад орж, түүнээс хойш шинэчлэл хийгдээгүй элэгдэж, хуучирсан турбины төхөөрөмжүүдийг шинэчлэх төслийг эхлүүлсэн нь ийнхүү амжилттай хэрэгжсэн сайн талтай. Муу мэдээ гэвэл Хөгжлийн банкнаас авсан  244 тэрбум төгрөгийн зээлээ төлж чадаагүй. Гэсэн ч нийслэлийн иргэд өнөөдөр дулаан цахилгаантайгаа, салбарын сайд “аргална даа” гэсэн үгтэйгээ сууж байна.

Харин цаашид яах вэ? Дөрөвдүгээр цахилгаан станц зуухны өргөтгөл хийх зайлшгүй шаардлага үүссэн. Энэ өргөтгөлийг хийж байж нийслэлийн иргэдийн цахилгаан дулааны найдвартай байдал хангагдах ёстой. Гэвч тус компани Хөгжлийн банкнаас зээл аваад төлөөгүй муу түүхтэй. Одоогоор салбарын сайдад хэрхэн хөрөнгө босгож, ямар байдлаар зуухны өргөтгөлийн ажлыг хийх талаар төлөвлөгөө алга.  Ирэх онд аргалаад тэг зогсолтод орчихгүй шиг хаврыг угтлаа гэхэд ХОЁР жил “АРГАЛНА” гэдэг үлгэр шүү, Б.Чойжилсүрэн сайд аа. 

П.ГОО