Монгол Улс шатахуунаа авдаг ОХУ-ын газрын тосны үйлдвэрт гал гарчээ
2022-11-28

ОХУ-ын томоохон газрын тос боловсруулах үйлдвэрүүдийн нэг болох Эрхүү мужийн Ангарск хот дахь газрын тосны үйлдвэрт гал гарчээ. Регнум агентлагийн мэдээлснээр, газрын тос боловсруулах үйлдвэрт 11 дүгээр сарын 27-ны өдөр гал гарсан байна. 

 

Эх сурвалжийн мэдээлснээр, 11 дүгээр сарын 27-ны өглөөний есөн цаг орчимд үйлдвэрийн талбайн дулаан солилцооны технологийн төхөөрөмж дээр гал гарчээ. Гал сөнөөгчид ирэхэд гал түймэр 200 квадрат метр орчим талбайг хамарсан байсан аж. Улмаар 13:17 цагт галыг унтрааж чадсан байна.

 

Оросын хэвлэлүүдийн мэдээлснээр, энэ галын улмаас хүний амь нас, эрүүл мэндэд хохирол учраагүй, түүнчлэн үйлдвэрийн үйл ажиллагаанд нөлөөлөхгүй гэнэ. Галын шалтгааныг тодруулахаар ажиллаж байгаа гэж Регнум агентлаг мэдээлжээ.

 

"Ангарскийн газрын тос химийн компани" нь Роснефтийн бүрэлдэхүүнд багтдаг. Энэ үйлдвэр нь газрын тосны бүтээгдэхүүн үйлдвэрлэлтээрээ Дорнод Сибирьт томоохонд тооцогддог юм. Үйлдвэр жилд 10,2 сая тонн газрын тосны хүчин чадалтай аж.

 

Г.Бямбасүрэн

Shuud.mn
Сонин хачин