УИХ-ын чуулганы нэгдсэн хуралдаанаар Газрын тосны бүтээгдэхүүний тухай хуулийн нэмэлт өөрчлөлтийг хэлэлцэж байна.

Хэлэлцүүлгийн үеэр Уул уурхай, хүнд үйлдвэрийн сайд Ж.Ганбаатар дизель түлшний тасалдлын тухай гишүүдийн асуултад “Дизель түлшний хувьд асуудал үүссэн. Асуудал үүссэн гол шалтгаан нь ОХУ-ын дотоод нөхцөл байдалтай холбоотой. Бид асуудлыг шийдвэрлэхээр ажиллаж байна. Манай улсад дизель түлшний 60 хувийг Роснефть компаниас, үлдсэн 40 хувийг бусад трейд компаниуд нийлүүлдэг. Роснефть компанийн нийлүүлэлт хэвийн байгаа. Трейд компаниудын нийлүүлэлтийг ОХУ-ын Эрчим хүчний дэд сайдаар ахалсан ажлын хэсэг хязгаарласан.

Бид БНХАУ-аас дизель түлш импортолж эхэлж байна. Одоо 24 мянган тонн түлш ачигдсан байна. Эхний ээлжинд шатахуун түгээх станцуудыг түлштэй болгох асуудлыг тавьж байна. Энэ асуудал нааштай шийдэгдэж байна. Нийтийн тээвэр, хот хоорондын тээврээ зогсоохгүйн төлөө ажиллаж байна. Мөн уурхайнуудын асуудал бий. Асуудал бага багаар сайжирч байна.

Энэ бол бидэнд өнөөдөр тохиолдож байгаа асуудал биш. ОХУ-аас шатахуун импортолдог улсуудад тохиолдож буй бэрхшээл" гэсэн хариулт өглөө.